Naalakkersuisooqatigiilersut
Qaasuitsup Kommunia avinneqassaaq
Upernavik, Uummannaq aamma Qaanaaq kommuninngorniartut, Qeqertarsuup Tunuani illoqarfiit immaqa arlalinngorlugit aamma avinneqassapput. Tamanna naalakkersuisooqatigiinnissamut isumaqatigiissummi takuneqarsinnaavoq
Siumup, Demokraatit Atassutillu siulittaasuisa naalakkersuisooqatigiinnissamut isumaqatigiissutertik sisamanngornermi atsioqatigiiffigalugu saqqummiuppaat.
Naalakkersuisooqatigiinnissamut isumaqatigiissut qulequtaqartoq ‘Ataatsimoorneq, toqqissisimaneq aamma ineriartorneq’ 29-nik immikkoortortoqarpoq naalakkersuisooqatigiilertussat anguniagassaannik. Taakkua ilagaat kommuuninut tunngasut.
Atuaruk: Siumut, Atassut aamma Demokraatit naalakkersuisunngortitsipput
Atuaruk: Uran aalajangiisuuvoq
Qaasuitsup Kommunia avinneqassaaq
Naalakkersuisunngortussat Qaasuitsup Kommunia marlunngorlugu imaluunniit amerlaninngorlugu aggulunniarpaat.
- Innuttaasut taasereernerat ataqqillugu Qaasuitsup Kommuniata avinneqarnissaa sulissutigineqassaaq naammassineqarlunilu.
Taamaalilluni Uummannaq, Upernavik aamma Qaanaaq kommuninngussapput, illoqarfiit sinneri Qeqertarsuup Tunuaniittut Naalakkersuisunit Qaasuitsup Kommunia peqatigalugu qanoq pilersineqarsinnaanersut nalilersorneqassasut.
Taakkua saniatigut Naalakkersuisut Tunu kommunitut immikkuullarissutut pilersinneqassanersoq nalilersuiffigissavaat.
Naalakkersuisoqarfinni akisussaaffiit sorliit Siumumit, Demokraatinit aamma Atassummit akisussaaffigineqassanersut ulluni aggersuni saqqummiunneqassapput.
Siumut Naalakkersuisuni tallimanik ilaasortaatitaqalersussaq, Atassut aamma Demokraatit tamarmik marlunnik ilaasortaatitaqalissapput.
Inatsisartuni qinigaaffinni sivisunerpaamik ilaasortaasimasup, Siumumeersup Lars-Emil Johansenip, naatsorsuutigaa Inatsisartut decembarip aqqaneq aappaani inissitsiterlutik ataatsimiisinneqarumaartut.
Atuaruk: Qaasuitsoq: Kommunep avinnissaa amerlanerussuteqarluartut taperserpaat