Skip to main content

Qaammammut akissarsiat 5.000-nik qaffakkaat

Isumaginninnermut siunnersortinik pisariaqartitsineq annertungaarmat, kommunit akissarsiat annertuumik qaffattariaqaraat

Isumaginninnermut ilinniarsimasut ullumikkut 280-it missaanniipput, kisianni amerlanngitsuinnaat ilinniakkaminni sulipput. Isumaginninnermut ingerlatsisoqarfiit meeqqat atugarliortut pillugit suliarujussuit kivitsiniarmata, maanna sulisussaqarumalluni pilerisaarisoqarpoq; aningaasat atorlugit.

- Isumaginninnermik siunnersortit aqutsisuusut akissarsiat aalajangersimasuni agguaqatigiisillugu missingerlugu 33.000 koruuninit 38.000 koruuninut akissarsiat qaffariaateqassapput, Naalakkersuisunit isumaqatigiissutit nutaat pillugit nutaarsiassami tamanna atuarneqarsinnaavoq.

Aningaasarsiat qaavatigut 2.700 koruunit
Tamanna qaammammut akissarsianut 5.000 koruuninik qaffariaataavoq. Meeqqanut inuusuttunullu isumaginninnermut siunnersortinut akissarsiat aamma qaffanneqarput, taamaalilluni aningaasivimmi malunnaataassallutik.

- Akissarsiat agguaqatigiisillugu qaammammut missingerlugu 28.600,-koruuniniit 31.300 krouuninut akissarsiat qaffariaateqassallutik, tamatumani isumaginninnermik siunnersortit meeqqanut inuusuttunullu kommunip pisortaqarfiini sullissisuusut akissarsiarisai qaffaavigineqarlutik, taama allaqqavoq.

Tassa qaammammut 2.700 koruuninik qaffariaateqarput.

- Kommunini isumaginnittoqarfinni inunnik isumaginnittunik qinnuteqartoqarnissamut sulilernissamullu malunniuteqarfiusumik kajuminnarnerulersitsinerit pingaaruteqartut maanna alloriarfigineqarput, oqaaseqaammi naqissuserneqarpoq.

Ataatsikkut arfinilinnik pissarsiortut
Sulisussarsiornermut allagartaliissutit qiviaraanni, isumaginninnermut siunnersortit kommunini amigaataasut takuneqarsinnaavoq. Kommune Kujalleq ilaatigut ingerlatsivimminni meeqqat pillugit suliassarpassuarminnut inuttassarsiorput.

- Inunnik Isumaginnitoqarfimmi Nanortalimmi ataaseq, Qaqortortumi pingasut Narsamilu marlunnik Isumaginninnermik siunnersortinik meeqqanik inuusuttuaqqanillu sullissisunik pissarsiorput, maanna sulisussarsiornermut allagartaliussami tamanna allaqqavoq.

Ukioq manna nalunaarusiarineqartumi isumaginninnermut siunnersortit atugaat pitsanngorsarneqartariaqartut ilaatigut oqaatigineqarpoq, taanna Ilisimatusarfimmi ilisimatuumit adjunktimillu Steven Arnfjordimit, aamma ilisimatuumit Lise Hounsgaardimit Sydjysk Universitetimeersumit suliarineqarnikuuvoq.

Atuaruk: Inunnik sullissisut: Robottiunngilagut

Tamanut Nuuk Ugeavisimi tamanna saqqummiunneqarpoq, isumaginninnermut siunnersortit eqimattat apersorsimasaat ilaat, suliaminni kisimiittutut aamma ingerlatsivimmi ingerlateqqinneqartannginnerat qasunaralugu misigisimapput.

Ilinniaqqinnerulerneq
Meeqqanik inuusuttunillu atugarliortunik sullissinermi unammillernartumi piumasarpassuaqartumilu sulisut pileritsatsillugillu ataannarnissaannut aningaasat kisimik neqitarineqassanngitsut, Naalakkersuisut neriorsuipput.

- Kommunini suliassanik ingerlatsisuusut ullumernit pitsaanerujussuarmik ikorfartorneqartariaqarput. Isumaginninnermut Aqutsisoqarfissap nutaap aallarnisarneqarneratigut suliniutissat arlaqaqisut aqqutigalugit alloriarnerit tulliit tiguneqarlutillu ingerlanneqassapput, Naalakkersuisut nalunaaruteqarput.

- Tamatumani suleriaatsit assigiissarneqarnissai, ilinniartitseqqittarnerit, ilisimasanik katersuivik qarasaasiakkut pitsaanerusumik avitseqatigiiffiusussaq, periusissanik periarfissaasunik ullumernit pitsaanerusumik takujuminarsaanissaq, minnerunngitsumillu ataavartumik qitiusoqarfimmit ilisimasaqartunit ikorfartorneqartuarnikkut ikiorsiinerit tamatumani qitisumit aqutsisoqarfimmi sulisut suliassanik ilisimasaqartunit ikorfartuinerit assigisaallu. 

Maanna iliuuseqartoqassaaq
Meeqqanut inuusuttunullu susassaqarfimmi ataatsimut iliuuseqarnermut akissarsiat qaffanneqarnerat ilaavoq.

- Meeqqat inuusuttullu sumiginnarneqartunut pissutsinik pitsanngorsaanissat suliarineqarnissaani iliuusissat piffissaq sivisooq atorlugu suliassat kivinniarneqassapput, suliassaqarfilli pineqartoq tamakkerlugu misissoqqissaarlugu suliarivarput iliuusissallu piareerpagut. Suliniutissarpassuit eqeersimaartumik piviusunngortinneqarlutik atuutsinneqalernissaat maanna tulliuppoq, Ilaqutariinnermut, Naligiisitaanermut Isumaginnittoqarfimmut Inatsisinillu Atortitsinermut Naalakkersuisoq Sara Olsvig oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER