PPK akiuussutissamik kapitinnissamut kaammattuivoq
PPK-p siulittaasuata peqqinnissaqarfimmi sulisut kaammattorpai coronamut akiuussutissamik kapiteqqullugit. Erseqqissarluguli neqeroorfigineqartoq naaggaarsinnaanermik pisinnaatitaaffeqarnera aamma ataqqillugu.
Coronavirusimut akiuussutissamik kapitinnissamut neqeroorut akuerisiuk, peqqinnissaqarfik isasuunnginnissaa pillugu.
PPK peqqinnissaqarfimmi sulisunut taama kaammattuuteqarpoq.
- Akiuussutissalertinnissaq isumassarsiatsialaasoraarput, PPK-mi siulittaasoq, Ken Jensen Sermitsiaq.AG-mut oqarpoq.
Akiuussutissat akoreerlugit kapisinernut 1100-nut naammattut nunatta pigilereerpai. Nuummi Ilulissanilu peqqinnissaqarfiit ataasinngorneq 4. januar aallarnerfigalugu akiuussutissanik kapuilerput. Siullermik utoqqaat, tulliullutillu utoqqarnik isumaginnittut peqqinnissaqarfimmilu sulisut.
Sanami immikkoortortaqarfimmi ataatsimi sulisuni 23-ni 20-t akiuussutissamut kapitinnissamut naaggaarallarsimapput.
Ken Jensen tassunga atatillugu kaammattuuteqarpoq:
- Peqqinnissaqarfimmi sulisut akiuussutissamik kapitinnissaat kaammattuutigiumavarput. Aammali ataqqivarput inuit ataasiakkaat neqeroorummut naaggaarsinnaanermut pisinnaatitaaffeqarnerat, Ken Jensen oqarpoq.
Tamanut illersuutaasoq
Peqqinnissaq Pillugu Kattuffiit siulittaasuata ilisimatitsissutigaa coronamut akiuussutissalersuineq pillugu saaffiginnissutinik tigusaqarsimanatik.
Erseqqissarpaa akiuussutissaq sulisut covid-19-imik tunillatsinnissamut illersuutigissagaat eqqaamaneqartariaqartoq.
- Akiuussutissamik kapitinnissaq pingaaruteqarpoq, innuttaasummi sullitat taamaasilluni sullittuarsinnaaneri qulakkeerneqassammat, aammalu peqqinnissaqarfiup isasuunnginnissaa qulakkeerneqassalluni, PPK-mi siulittaasoq Ken Jensen oqarpoq.