Sana sulisuminik akiuussutissalersuisoq
Nuummi Dronning Ingridip Napparsimmavissuani sulisut 180-it missaanniittut ataasinngornermi marlunngornermilu coronavirusimut akiuussutissalersorneqassapput, tamarmilli neqeroorummut akuersaarsimanngillat.
Aappariit Karsten aamma Hanne Rex, marluullutik Dronning Ingridip Napparsimmavissuani nakorsaatitortunut immikkoortortaqarfimmi nakorsaasut, napparsimmavissuup sulisuini siullersaallutik coronavirusimut ataasinngornermi akiuussutissalerneqarput. Marluullutillu tamatuma naammassineqarnera nuannaarutigaat.
- Pingaarutilerujussuuvoq, qujamasoqaangalu akiuussutissalerneqarnissamut periarfissqalereeratta, Karsten Rex suleqatiminit akiuussutissamik kapitereerami Sermitsiaq.AG-mut oqarpoq.
- Angalaqqilersinnaaqqikkusuppugummi, Hanne Rex illarluni oqarpoq. Erseqqissaassugaali imminuinnaq eqqarsaatiginatik aammali ilaquttatik napparsimasullu eqqarsaatigalugit akiuussutissalertinniarlutik aalajangersimallutik.
Taakku nakorsat marluulluik napparsimasuuteqarput timimikkut akiuussutissaqarpallaanngitsunik, taamaammallu corona eqqarsaatigalugu taakkunannga mianerinnikkusunnerarput.
Immikkoortortaqarfimmi sulisut tamangajalluinnarmik akiuussutissalertikkusuussimanngitsut
Sulisulli tamarmik akiuussutissalertinnissamut akuersaarsimanngillat. Taamatut oqaluttuarpoq nunap immikkoortuani peqqissaasut pisortaat Inuuti Fleischer.
- Assersuutigalugu immikkoortortaqarfimmi ataatsimi sulisutta 23-iusut akornanni 20-t akiuussutissalertinnissamut aallaqqaammut qujaannarsimapput, taanna oqaluttuarpoq.
Taassuma nassuiaatigaa, tamatumunnga pissutaasoq akiuussutissap piffissap sivisunerusup ingerlanerani kingunipiloqarsinnaanerata nalornissutigineqarnera, aamma sunniutissaa pillugu ilisimatitsissuteqartoqannginnera.
- Siusinnerusukkummi takuneqareerpoq, akiuussutissat ajunngivissumik atorneqareerlutik, piffissaq sivisunerusoq qaangiukkaangat kingunipiloqarsinnaasarnerat. Tamatuma soorunami inuit qulalersissinnaavai. Tamannalumi paasilluarsinnaavara. Akiuussutissarli una pineqartoq misilerarneqarluarsimavoq, ilisimalikkavullu malillugit atorneqarnissaa ajortussaqartinngilara, taanna erseqqissaavoq.
Paasissutissiineq maligassiuisullu
Sulisut oqaloqatigineqartarput, akiuussutissalertinnerminni susoqarnissaa ilisimaniassammassuk, aamma pingaaruteqarpoq nunatsinni nakorsat ullumi siulliullutik akiuussutissalertinneqarnerat, Inuuti Fleisher oqarpoq.
- Sulisut sinnerinut maligassiuisuupput, siulliullutillu akiuussutissalertikkusussimanerat pingaaruteqarluni, taanna oqarpoq. Sulisut arlallit pisortanit oqaloqatigineqareerllutik akiuussutissalerneqarnissamik neqeroorfigineqarnertik eqqarsaatigeqqinniarpaat.
Karsten aamma Hanne Rex marluullutik isumaqarput, inuit namminneq aalajangissagaat akiuussutissalertissanerlutik, marluullutilli qularuteqannginnerarput.
- Tubemik atuinissamut sanillullugu kapitikkusunneruvunga, Karsten Rex oqarpoq.
- Tamanna aamma nuliannut atuuppoq, nuliarami peruluttut uninngasarfianni qinngamigut tubemik atuisoq takorusunngilara, taamaammat talikkut kapitikkusunneruvugut, taanna naggasiilluni oqarpoq.
Inuuti Fleischerip innuttaasut akiuussutissalertinnissamik neqeroorfigineqarunik akuersinissaannut kaammattorpai, uteqqillugulu oqaatigalugu nammineerluni oqartussanut saaffiginnittoqassanngitsoq. Kapitinnissamut piffissanngorpat attaveqarfiginnittoqartussaammat, taanna ilisimatitsivoq.