Polar Seafood sukaterinialersoq

Sapaatit akunneri kingulliit Polar Seafoodip maanna ukiuni 32-inngortuni ingerlanermini aqqusaagaasa ajornerpaartaraat.

Polar Seafoodimi siulersuisuni siulittaasoq Henrik Leth tusagassiuutinut nalunaarummi allappoq.

- Island-imi alianartumik pisoq suliffeqarfiup aalassatigerujussuarpaa, apeqqutaanani tigummigallarneqartup akisussaasuunera akisussaa. Tamannami eqqartuussivimmit aaliangiiffigineqassaaq, uagullu eqqartuussiveqarfik 100%-imik tatigivarput.

- Niviarsiannguamik toqutsinerup misisorneqarnerata saniatigut Polar Nanoq-mi aamma hash-imik 20 kg-mik politiit nassaarput, Henrik Leth oqarpoq.

Atuaruk: Hashi pillugu suliami Islandimi politiit suleqatigigaat

Pisoqaqqinnginnissaa sulissutigaat

Umiarsuaateqarfik isumaqarsimagaluarpoq anngiortumik ikiaroornartumik eqqussinnginnissamut iliuutsitik eqqussisinnaanermut pinngitsoortitsissutaasinnaasut.

- Ajoraluartumilli paasinarsivoq taamaanngitsoq. Pisup qulaajarniarnerani Kalaallit Nunaanni Islandimilu politiit suleqatigivagut, saniatigullu suliffeqarfitta iluani periusissanik taaneqartutut pisoqannginnissaanik isumannaarinnissutaasinnaasunik pilersitsiniarsarivugut, siulersuisuni siulittaasoq erseqqissaavoq.

Atuaruk: Kilisaatit ikiaroornartulerisunik inuttallit akuersissutaarneqartalernissaannik Enoksen sioorasaarivoq

Tamanna Kalaallit Nunaanni, Danmarkimi Islandimilu oqartussaasut suleqatigalugit pissaaq.

- Soorunami maanna isumannaallisaaniarnerput suleriaatsigullu nalilersoqqissavagut. Suut tamaasa sulinitsinni atussavagut isumannaarniarlugu nunatta, suliffeqarfiutitta sulisuttalu eqqorneqaatissaannik pisoqaqqinnginnissaa. Tamatumunngalu atatillugu naqqissuserumavara, umiarsuatsinni inuttagut aqutsisut tungaannit tatigalugillu tapersersorumagatsigit, Henrik Leth oqarpoq.

Atuaruk: Ikiaroornartumik anngiortumik eqqusseriaraluartutut pasineqarunnaartoq