Hash
Hashi pillugu suliami Islandimi politiit suleqatigigaat
Islandimi toqutsisimasutut pasineqartut aappaa, aamma hashimik 20 kiilunik eqqusseriartutut pasineqarpoq. Nunatsinni politiit misissuinermut 'soqutiginnipput', kisianni oqassaanngitsumik
Polar Nanormi hashi 20 kiilu nalaatsornerinnakkut nassaarineqarpoq.
Birna Brjánsdóttirip toqutaaneranut atatillugu misissuinermi Islandimiut politiivisa hashi 20 kiilu aamma nassaaraat.
Hashimut suliamut tunngatillugu inuttaq alla siullermik Reykjavikimi politiinit tigusarineqaraluarpoq, kisianni piffissap sivikitsup ingerlanerani pasineqarunnaarpoq.
Danmarkimeersoq
Kingornalu toqutsisimasutut pasineqartut marluusut aappaa aamma hashimut suliami pasineqarpoq.
Hashi kilisaatip juullip ukiortaallu kingorna Frederikshavnimi umiarsualivimmiinnerani ikineqarsimassasoq, Nunatsinnullu eqqunneqarniarsimasoq politiit ilimagaat.
Kalaallit 'soqutiginnittut'
Kalaallit Nunaanni Politiit taamaattumik hashimut tunngatillugu Islandimi suleqatitik qanimut suleqatiginninnerat pissusissamisoorpoq.
- Suliamut soqutiginninnerput qularnanngilluinnarpoq, vicepolitimesteri Morten Nielsen Sermitsiaq.AG-mut oqarpoq.
Aanngajaarniutinut sulianut tunngatillugu nalinginnaasumik taanna oqassaanngilaq.
Atuaruk: Ikiaroornartumik anngiortumik eqqusseriaraluartutut pasineqarunnaartoq
Annertooq
Hashi 20 kiilunik oqimaassusilik Nuummi aqqusinermi 14 millionit koruunit missaanni naleqarpoq. Tamatuma annertussussaa suliami inuk ataasiinnaanngitsoq attuumassuteqarneranut tikkuarpoq.
Kalaallit Nunaanni eqqussamik tigusineq, aamma nassiussinermut pilersaarusiorneq ataasiinnaanngitsumik pisariaqartitsisarpoq. Tamatuma saniatigut hashi taama annertutigisoq aningaasarpassuarnik pisariaqartitsivoq.
- Suliani nunanut marlunnut tunngasuni taama ittuni Islandimi politiit suleqatigilluartuaannarpagut, Morten Nielsen uppernarsaavoq, taassuma qanoq suleqatigiinnertik itisilerumanngilaa.
Islandimi politiit pasineqartoq pillugu paasissutissat kalaallit politiivisa pigisinaasaat tamaasa soqutigissavaat.