Naalakkersuisooqatigiilersut
Pisortatigoortoq: Aajuku Naalakkersuisunngortut
Siumup siulittaasua Kim Kielsen Naalakkersuisut siulittaasussaattut pingasunngornermi tusagassiortunik katersortitsisoqarnerani ilisaritinneqarpoq
Inatsisartunut qinersisoqarneraniit ullut aqqaneq marluk qaangiuttullu kiisalu naalakkersuisooqatigiinnissamut isumaqatigiissutip atsiorneqarneranit ullut arfinillit qaangiuttullu naalakkersuisuni ilaasortanngortussat qulingiluat ilisaritinneqarput.
Tamanna pivoq Nuummi tusagassiortunik pingasunngornermi katersortitsisoqarnerani.
Naalakkersuisooqatigiinnissamut isumaqatigiissutip atsiorneqarneranili ilisimatitsissutigineqarpoq Siumut naalakkersuisuni tallimanik ilaasortaatitaqarumaartoq, kiisalu Atassut Demokraatillu tamarmik immikkut marlunnik ilaasortaatitaqarumaartut.
Naatsorsuutigineqareersutut Siumup siulittaasua Kim Kielsen Naalakkersuisut siulittaasusaattut ilisaritinneqarpoq, naalakkersuisunut siulittaasup tulliatut inissittussanngorpoq Demokraatineersoq Anda Uldum, taanna aamma aningaasaqarnermut aatsitassanullu naalakkersuisunngussaaq.
Naalakkersuisunut ilaasortanngortut qungiluat aajuku:
- Naalakkersuisut siulittaasuat aamma nunamut namminermut naalakkersuisoq Kim Kielsen, Siumut
- Aningaasaqarnermut aatsitassanullu naalakkersuisoq aamma Naalakkersuisusut siulittaasuata tullia Anda Uldum, Demokraatit
- Ineqarnermut, sanaartornermut attaveqarnermullu naalakkersuisoq aamma Naalakkersuisut siulittaasuata tulliata aappaa Knud Kristiansen, Atassut
- Nunat allanut, inuussutissarsiornermut, suliffeqarnermut niuernermullu naalakkersuisoq Vittus Qujaukitsoq, Siumut
- Aalisarnermut, piniarnermut nunalerinermullu naalakkersuisoqnaalakkersuisoq Karl-Kristian Kruse, Siumut
- Isumaginninnermut, ilaqutariinnermut naligiisitaanermullu naalakkersuisoq Martha Lund Olsen, Siumut
- Kulturimut, ilinniartitaanermut, ilageeqarnermullu naalakkersuisoq Nivi Olsen, Demokraatit
- Peqqissutsimut nunani avannarlerluni suleqatigiinnermut naalakkersuisoq Doris Jakobsen, Siumut
- Pinngortitamut avatangiisinullu kiisalu inatsisinillu atortitsinermut naalakkersuisoq Mala Høy Kuko, Atassut
Tallimanngorpat pisortatigoortumik ivertinneqassapput
Naalakkersuisooqatigiilernissamut isumaqatigiinniartut pisortaata Kim Kielsenip sisamanngormat decembarip sisamaani partiit pingasuullutik isumaqatigiissutertik saqqummiuppaa.
Siumut novembarip 28-ani Inatsisartunut qinersinermi 11-nik Inatsisartuni ilaasortaatitaqalersoq, Demokraatit sisamanik Atassullu marlunnik isertitaqarput. Taakkua naalakkersuisooqatigiilersut katillugit 17-inik Inatsisartuni ilaasortaatitaqalerput, illuatungiliuttut 14-inik ilaasortaatitaqalersut.
Inuit Ataqatigiit illuatungiliuttuni anginersanngortut aqqanilinnik ilaasortaatitaqalersut Partii Naleraq pingasunik ilaasortaatitaqalerpoq.
Naalakkersuisunngortut nutaat Inatsisartut inissisititerlutik tallimanngornermi decembarip aqqaneq aappaani ataatsimiilerpata aatsaat pisortatigoortumik ivertinneqassapput.
Atuaruk: Inatsisartut tallimanngorpat inissititissapput
Atuaruk: Siumut, Atassut aamma Demokraatit naalakkersuisunngortitsipput