Skip to main content

Nuummi 10 C - Ukiumi unammiuaartitsisussat ajornartoornermi pilersaaruteqarput

Nuummi Arctic Winter Gamesimi aaqqissuisut kianneranik aamma aputikinneranik annilaanganngillat

Silasiortut ullaaq Venedigimi sisamanik kiattoq naatsorsorpaa, Nuummilu kiassiut 10-miippoq.

Tamaani illoqarfiup illuisa qaavini kuserpoq, apullu nunap qaaniittoq issunngitsoq nungukkaluttuinnarpoq.

Kisianni Arctic Winter Gamesimi aaqqissuisut, illoqarfiit pingaarnersaannut tikeraartunik 2.000-inik tikilluaqqusingajalersut ernumanngillat. Tassami pilersaaruteqarput.

- A-mik, B-mik aamma C-mik unammiuaartitsisoqarnissaanut pilersaaruteqarpugut. Aputeqassuseq naapertorlugu unammiffissat takissusaat naalisissavagut. Inunnik nutaanik pilersitsisinnaasunik peqarpugut, tamakku pillugit suliaqartut, Arnakkuluk Jo Kleist, unammiuaartitsinernut pisortap tullersortaa Sermitsiaq.AG-mut oqarpoq.

Atuaruk: AWG-mi kajumissutsiminnik suleqataasut pikkorissarnerat maanna aallartippoq

- Aputeqarnerutillugu periarfissagut amerlanerussapput, taanna oqarpoq, Nuummilu apummik amigaateqartoqarsimanerani majuartaammiittut siornatigut isumassarseriataarsimanerannut unnersuuteqarluni.

Nuummi aputeqanngitsoq
Assersuutigalugu 2013-imi ujakkaarluni GM-erneq løjpemi naatsuaqqami Nuup qaqqaasa ilaani Quassussuarmi ingerlanneqarnikuuvoq.

Arnakkuluk Jo Kleist nassuiaavoq, aputiliortaatinik nutaarsuarnik Arctic Winter Gamesimut pisisoqarsimasoq, taakkulu aputiliiumaartut ulluni 45-ni apinngitsuussagaluarpat.

Kisiannimi Nuummi qulinik kiatsillugu aputiliorsinnaanngilasi? 

- Naamik, kisianni maanna nillertissangatinneqaleraluarpoq. Soorunami aputeqarusuppugut, taamaattumillu silassaq maanna nakkutigiinnavipparput, qujanartumillu sapaatip-akunnerata tulliani ulloq ataaseq affaalu apinissaanik takussutissaqarpoq.

Assit takukkit: AWG-p qullissani tiguaa

Kisianni DMI-p apummik ilimasaarutaat sapaatip-akunnerini kingullerni ilumuunngeqattaarnikuupput, aammalu silasiorfiup ilimasaarutaanit sila allaanerusaqattaarnikuulluni.

Tunniutiinnanngitsut
Taamaattumillu Arctic Winter Gamesimik aaqqissuisut qorsunnik atisaqartut aaqqiissutissamik allamik aallartitsipput, pisortap tullersortaa oqarpoq.

- Qujanartumilli inunnik tamakkuninnga suliaqartut tunniutiinnarneq ajorput. Apummik amigaateqarnitsinnut tunngatillugu qanoq iliorsinnaanerluta misissorsimavarput. Tassa illoqarfimmi aput katersuunneqarsimasoq nuussussavarput. Aputit løjpemut aamma majuartaammut ingerlapparput.

Atuaruk: Arctic Winter Gamesip ajunngitsuliuutaanut katersuiniarneq

Arctic Winter Gamesip kommuni suleqatigaa aammalu illoqarfiup majuartaataa løjpet piareersarneqarnerannut, illernit aamma ujakkaarfiit, snowboard, arpaffiit, sangusaarfiit aamma snowsnake.

- Februaarimi apilluarnissaa kissaatigaarput, aammalu atuaasartusi tamaasa neriuuteqaqataanissaat kaammattuutigerusoqaara, Arnakkuluk Jo Kleist Sermitsiaq.AG-mut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER