sanaartorneq
Nunatsinni sanaartupiloorneq: Jyllandip avannaani suliffeqarfiit tikilluaqqusaapput
Jyllandip avannaani suliffeqarfiit milliardinik isertitaqassapput
Kalaallit inissiaataasa affaat nungullarsimapput, milliardinillu marlunnik kisitsisitallit nalinginut nutaanik sanaartortoqassaaq.
Jyllandip avannaanni sanaartornermik suliaqartunut annertuumik piniartoqarnissaanik tamanna isumaqarsinnaavoq. Sulillunili aallartitsinnani, qallunaat suliffeqarfiutaat Kalaallit Nunaanni pissutsinik paasisaqaqqaartariaqarput, Arctic Consensusimi pisortaq, Lise-Lotte Terp, DR Nordjyllandimut taama oqaluttuarpoq.
Atuaruk: Kalaallit Nunaanni nutartigassarujussuit
Periarfissarpassuit
- Periarfissatsialappassuupput. Jyllandimi suliffeqarfiit tassani sanaartorfiusussami, najukkami ataqatigiittumik eqqarsarnissaat tassani pineqarpoq, taanna oqarpoq.
Ineqarnermut naalakkersuisumit, Knud Kristiansenimit (A), tamanna aamma akuersaarneqarpoq.
- Tamaat ataatsimut isigalugu unammilligassarujussuuvoq, minnerpaamik 12-15 milliardit koruuninik akissatigut kinguartooqqanerput pissutigalugu, allariaqqinnissaq maanna ingerlapparput, taanna DR Nordjyllandimut oqarpoq.
Atuaruk: Nunatsinni illoqarfiit ineriartornerpaaffiani sanaartugassanik niuerneq nutaaq
Piumasaqaatit sukangasut
Suliassarpassuit qanilligaluartut, inuit sanaartornermik suliaqartut amerlassusaat Nunatsinni ukiuni kingullerni appariarsimapput.
Taamaattumillu suliffeqarfiit nunanit allaneersut tikilluaqqusaapput, Knud Kristiansen naqissusiivoq.
- Soorunami. Sanaartornermik suliaqartut nunanit allaneersut tikinnerisigut, ilisimasat nutaat Nunatsinnut eqqunneqassapput, tamannalu pisariaqartinneqarpoq, taanna oqarpoq.
Kalaallit Nunaanni illut nutaat sanaartorneqartut siunissami piumasaqaatinut sukanganerusunut naammassinnittuussapput.
Atuaruk: Praktikkerfissat maanna amerleqqittariaqarput