Robert Petersen 93-inik ukioqarluni Odensip universitetshospitaliani toqukkut qimaguppoq. Tamanna jornguata Jakob Petersenip Sermitsiaq.AG-imut uppernarsarpaa. 

- Robert Petersen seqerngup qinngornerisa siulliit nuinerani anerningerpoq. Sapaatip akunnerata missaa napparsimareerluni 93-inik ukioqarluni toqukkut qimaguppoq, Jakob Petersen oqarpoq. 

Ilisimatusarfiup Robert Petersenip tunngavilerpaa. Inuit akornanni siullersaalluni ilisimatuunngorpoq, nunat tamalaat akornanni ilisimatusartarsimavoq, ilinniartitsilluni maannalu Ilisimatusarfiup inissisimaneranut aqqutissiuisuulluni. 

- Kalaallini siullersaalluni ilisimatuunera meeraallunga tanngassimaarutigisarnikuuara. Inuk qungujulaartuaannarpoq, oqaluukkuminartuuvoq asannittuullunilu. Arlaanik quianartumik oqaluttuarnissaminut piareeqqasuaannarpoq qangalu pisarsimasut pillugit aamma oqaluttuassalluni nuannarisarlugu. Qanigisagut qimagukkaangata takorloortakkatsitut illuinnaqqissaarpoq, Robert Petersenip jorngua oqarpoq. 

Robert Petersen Maniitsumi 1928-mi apriilip 18-ani inunngorpoq. Ilinniarfissuarmi 1948-mi ilinniartitsisunngorpoq, Danmarkimilu 1953-imi ilinniartitsisunngorluni. 1967-imilu Københavnip Universitetiani mag.art.-itut soraarummeerpoq, Københavnip Universitetianilu eskimologiimi 1975-imi professorinngorluni.

- Robertip ilaquttani pingaartittorujussuai uummatiminiitsittuarlutalu. Inuk ajunngitsumik siunertaqartuaannartuuvoq. Allanik ajorinnilluni oqaluttoq tusaasimanngisaannarpara. Utoqqaligami pisusinnaanera ilungersinarsimmat imminut uagutsinnullu eqqaassutigiuarpaa ajornerusumik napparsimannginnini. Inuk ajunngitsumik nuannersumillu eqqarsartuartutut eqqaamassavarput, Jakob Petersen oqarpoq. 

Ataqqinaammik doktori

Robert Petersen Ilisimatusarfimmi Inuit Institut-imi 1983-imi pisortaavoq, taannalu siuttuuffigisimallugu. 1987-imiit 1995-imi soraarninngornissami tungaanut Ilisimatusarfiup universitetitut taaguuteqalerneraniit tassani rektoriuvoq.

Maanna nalunngisatsinni ilisimatusarfimmi nutaanerusumi 2010-imi ataqqinaammik doktorinngortinneqarpoq. Ilisimatusarfiup nunat tamalaat pitsaassusaannik naleqarnissaanik aallaqqaataaniilli anguniassagaa pingaartissimallugu.

1992-imi Laval Universitymi Quebecimi ataqqinaammikdoktorinngortinneqarpoq, 2010-mi Ilisimatusarfimmi ataqqinaammik doktorinngortinneqarluni. Arlalinnittaaq suliani pillugit nersorniarneqartarpoq. Issittumi ilisimatusarnerni ukiorpassuarni tatigineqarluni Robert Petersen suleqataavoq, nunat inoqqaavittaaq pillugit ilisimatusarluni suleqatigiinnut arlalinnut peqataasarluni. Allattaasitaap pilersinneqarnissaanut suleqatigiissitanut peqataavoq. Allattaasitaaq 1973-imi pisortatigoortumik atorneqalerpoq.