Nunami ikuallanneq qamittoq: Danskit qatserisartut angerlalersut
Nunamut kapputtakkat dronellu atorlugit danskit qatserisartut Kangerluarsuk Tullermi nunami ikuallanneq qamippaat. Arfininngorpat Danmarkimut angerlassapput.
Nunami ikuallanneq, Kangerluarsuk Tullermi juulip 8-nili aserorterisoq, qamippoq. Danmarkimi Upalungaarsimanermut Aqutsisoqarfimmi qatserisartut pisortaat Stig Hammerhøj, suliami peqataasimasoq oqarpoq.
- Ikuallanneq qamippoq, ikuallaqqilissagaluarpallu titarnernik uniffissaliorsimavugut ikuallannerup, siaruaannissaanut aarlerinaatilittaani, qaangersinnaanngisaani, Stig Hammerhøj oqarpoq.
Sapaatip akunnera kingulleq marlunngornermi nunami ikuallanneq qamisarniarlugu danskit qatserisartut 38-t nunatsinnukartinneqarput ilimagineqarsimavorlu qamisaaneq ullunik 14-inik sivisussuseqassasoq. Sapaatip akunneratalu naannginnerani iluatsissimavoq taamaammallu danskit qatserisartut arfininngorpat angerlassapput.
Atortut nukittuut nutaallu iluaqutigalugit qatserisartut ikuallanneq qamisarpaat.
- Imermik milluaassutit sakkortunerit amerlanerillu kalaallit pigisaanniit amerlanernik nassarsimavugut. Nunamullu kapputtakkaliorsimavugut nunallu ilua taakkuninnga imerterlugu, qatserisartut pisortaat Stig Hammershøj oqarpoq.
Nunamut kapputtakkat imermillu milluaassutit saniatigut qatserisartut dronet suliamut atorsimavaat.
Qatserisartut arfininngorpat timmisartumik angerlassapput. Angerlarnissamik tungaanut qamisaaneq pillugu upalungaarsimasunut najugaqartunut saqqummiussinermut ullut atussavaat kiisalu nuna takornariarlugu, Stig Hammerhøj oqaluttuarpoq.