Nuna tamakerlugu eqqagassalerinermut suliniut 50 mio. koruuninnattoq
Naalakkersuisut aalajangerput Avatangiisinut Aningaasaateqarfik aqqutigalugu nuna tamakkerlugu eqqagassalerinermut suliniut 50 milliuunit koruuninik tapissallugu.
Avatangiisinut Aningaasaateqarfiup nuna tamakkerlugu eqqagassalerinissamut aaqqinissamut 2019-imi 12 milliuunit koruuninik aamma 2020-mi 10 milliuunit koruuninik immikkoortitsisimasoq nalunaarutigineqareerpoq.
Naalakkersuisulli nuna tamakkerlugu eqqagassalerinermut aaqqiissutissamut, ESANI A/S-imut annertunerusumik tapiissuteqarusupput.
Naalakkersuisut taamaammat aalajangerput Avatangiisinut Aningaasaateqarfik aqqutigalugu nuna tamakkerlugu eqqagassalerinermut aaqqiissutissamik pilersitsinermut 50 milliuunit koruuninik tapiissallutik.
Avatangiisinut naalakkersuisoqarfik tusagassiorfinnut taama nalunaaruteqarpoq.
- Naalakkersuisut kommunillu ukiuni arlaqalersuni eqqakkanut tunngatillugu pitsanngorsaatinik ingerlataqartarsimapput. Tamanna alloriarneruvoq siulleq. Eqqakkanut iliuusissanut pilersaarut 2020-2031 nutaanik pingaarutilinnik alloriartitsissaaq, avatangiisinullu Naalakkersuisoq Jess Svane tusagassiorfinnut nalunaaruteqarluni oqarpoq.
Eqqakkat sapinngisamik pissarsissutiginerpaanissaat kiisalu peqqinnissamut avatangiisinullu illersorneqarsinnaasumik passunneqarnissaat eqqakkanut iliuusissanut pilersaarummi nutaami ukkatarineqassaaq. Eqqakkat pissarsissutiginerujumallugit ilaatigut ikuallaavik atorlugu kiassaasoqartarpoq.
Anguniagaqarluartumik pilersaaruteqarneq
Naalakkersuisut kommunillu 2018-imi isumaqatigiipput nuna tamakkerlugu eqqagassalerinermut tunngatillugu aaqqiissummik pilersitsissallutik. Kommunit ataatsimoorlutik eqqagassalerinermi ataatsimoorussamik ingerlataat ESANI A/S maanna pilersitsiortuilluni suliaqarpoq.
Eqqagassanut ikuallaaviit marluk Sisimiuni Nuummilu pilersinneqassapput eqqagassanik peqqinnissamut avatangiisinullu naleqquttumik ikuallaasarnissamik qulakkeerinnittussat. Ikuallaaviit atorneqarnissamut 2022-mi 2023-milu piareersimanissaat naatsorsuutigineqarpoq. Illoqarfinnit nunaqarfinniillu eqqagassat poortorneqartassapput ikuallaavittaassanullu assartorneqarlutik, taamaaliornikkullu eqqagassat sineriammi eqaavissuarni qaleriiaatilernissaraluannik pingitsoortitsissallutik.