Naalakkersuisut eqqagassalerinermut 22 millioner koruuninik immikkoortitsisimasut
Naalakkersuisut kommunillu nuna tamakkerlugu eqqagassaleriffimmik pilersitsinissamut annertuunik aningaasaliissuteqassapput. Naalakkersuisut maanna ukiunut marlunnut 22 millioner koruuninik siunertamut immikkoortitsisimapput.
Nuummi Sisimiunilu eqqakkanut nutaaliaasumik ikuallaaveqassaaq, aamma Qaqortumi, Maniitsumi Aasiannilu uuliakoorutinik atuiffiusinnaasumik sanaartortoqassaaq.
Kommunit eqqagassalereqatigiiffik Esani siunertamut atugassaq pilersissimavaat, Naalakkersuisulli aamma tapiissuteqartussaapput. Naalakkersuisut taamaammat Avatangiisinut Aningaasaateqarfiup 2019-imi isertitaanit 12 millioner koruunit siunertamut atugassanngorlugit immikkoortissimavaat.
Naalakkersuisut 2020-mi aningaasaateqarfimmit 10 millioner koruuninik aamma immikkoortitsiniarput. Tamanna Avatangiisinut Aningaasaateqarfiup siullermeersumik ukiumoortumik nalunaarusiaani saqqummersinneqaqqammersumi atuarneqarsinnaavoq.
Aningaasaateqarfimmit tapiiffigineqarsinnaasut
Avatangiisinut Aningaasaateqarfiup aningaasaatai sunut salliutillugit atorneqartassanersut, Naalakkersuisut ukiut tamaasa aalajangersartarpaat. Suliassalli tulliullugit allattorsimasut iluini atorneqartassallutik:
1) ikuallaaviit eqqagassalerinermilu aaqqissuussinerit
2) anartarfilerinermut atortut
3) eqqakkanik inissiiviit nakkutigisat
4) qamutinik assakaasulinnik atorunnaartunik eqqaaneq atueqqinnerluunniit
5) suliffeqarfiit, sullissiviit, inissiat eqqaanni imaluunniit asimi eqqakkat
6) angallatit qimaannakkat
7) imaani aalisarnermut qassutit eqqakkallu allat
8) aalisarfinnik piniariartarfinnillu eqqiluisaartitsineq
9) suliassat, innuttaasut suliffeqarfiillu akornanni isumalluutinik atorluaalluni pissusilersornissamut periarfissiiffiusut.
Pissarsiffik: Avatangiisinut Aningaasaateqarfiup ukiumoortumik nalunaarusiaa
Nalunaarusiaq naapertorlugu, Avatangiisinut Aningaasaateqarfiup nammineq aningaasaatai, 2019-imi 15 millioner koruuniusut, nukissiornermi avatangiisinut akitsuutineersuupput. Ilaatigut motoorinut benziinamut kiisalu gas- aamma dieselolie-mut literimut akitsuummik 10 ørimik akiliisitsisoqartarpoq.
Kielsen: Suliniuteqarnissamut annertuumik soqutiginninneq nuannersuuvoq
Isertitat annerpaartaat nuna tamakkerlugu eqqagassalerinermut atorneqarsimapput, aningaasaateqarfilli aamma avatangiisinut tunngatillugu suliniutinut assigiinngitsunut, tre millioner koruuningajalluinnarnik tapiissuteqarnissamut akuersisimavoq.
Aningaasat 2019-imi qinnuteqartitsisoqareersoq tunniunneqarput, aningaasaateqarfik qinnuteqaatinik 58-inik taamanikkut tigusaqarsimavoq:
- Nuna tamakkerlugu pinngortitamik mianerinnittut suliniuteqarnissamut annertuumik soqutiginninnerat takullugu nuannersorujussuuvoq. Tamanna Avatangiisinut Aningaasaateqarfiup atorfissaqartinneqarne- ranik Naalakkersuisunut uppernarsaataavoq, Naalakkersuisut Siulittaasuat Kim Kielsen, ukiuumoortumik nalunaarusiami allappoq.
World Cleanup Day 10.000 koruuninik tapiiffigineqarsimasoq
Aningaasaateqarfik assigiinngitsorpassuarnut tapiissuteqartarpoq. Avatangiisinut Aningaasaateqarfiup assersuutigalugu Wold Clean Up Day 10.000 koruuninik tapiiffigisimavaa. Tassani Nuummi Nuutoqaq sinerlugu maanaannaq eqqakkat 55 kg. sinnerlugit annertutigisut katersorneqarsimapput.
Avatangiisinut Aningaasaateqarfik aamma Pinngortitaleriffiup, KNAPK-p kiisalu Sustainable Fisheries Greenlandip, Qeqertarsuup Tunuani aalisanermi atortukunik qalluillutik suliniutaannut 800.000 koruuninik tapiissuteqarsimavoq.
- Suliniut ukiut marluk sinnerlugit ingerlanneqassaaq. Qalluineq 2020-mi naammassineqassasoq naatsorsuutigineqarpoq. Tamatuma kingorna angusat nalilersorneqarlutillu saqqummiunneqassapput.