Tele Greenland marlunngornermi ullup-qeqqata siornatigut ileqquusumik ataatsimeersuarmat piginnittut, Namminersorlutik Oqartussat, nalunaarasuartaateqarfimmi siulersuisut nutaanik marlunnik ilaasortaqalernissaat aalajangerpaat.

Ilaasortanngortinneqarput Eqalunnguaq Abel Kristiansen aamma Tukummeq Arneq Egede Martinsen.

Eqalunnguaq Abel Kristiansen bestyrelser.gl-imi imminut ilisaritilluni allassimavoq, 34-nik ukioqarluni aamma ”Kalaallit Nunaata ineriartortinneqarnissaanut peqataarusulluinnarluni”. Ilisimatitsissutigineqarpoq, Royal Greenlandimi inuttaliinissamut ataqatigiissaarisuusoq, Kommuni Qeqertalimmi najugaqartuusoq siusinnerusukkullu Kalaallit Nunnaanni politiini atorfeqarsimasoq.

Inuk qitiutillugu

Tukummeq Arneq Egede Martinsen INI A/S-ip siulersuisuini ilaasortaareerpoq aamma Tunngavik Consultingimik pilersitsisuuvoq. Qeqqata Kommunianeersuuvoq, bestyrelser.gl-imilu imminut ilisaritilluni imatut allassimavoq:

- Misillitagaqarluartuullunga, aqutsinermi sungiusaasarlunga aamma inuup pisinnaasaanik paasinnissinnaassuseqarlunga suliffeqarfimmi inummik qanoq qitiutitsisinnaanermik pisariaqartitsisumi qinigassaalluartuuvunga. Sulisut imminnut ilisimaarilluartuusut aamma inuunermik qanoq atuinissamut paasisimasaqartuusut tunngavissaalluarput suliffeqarfit qaffasinnerusumik ilisimasaqartinneqalernissaannut.

1998-imiit 2004-mut Ilisimatusarfimmi Inuiaat Kulturiat Oqaluttuarisaanerallu pillugit bacheloritut ilinniarsimavoq.

Bosse siulittaasutut ingerlaqqittoq

Stine Bosse Tele Greenland A/S-ip siulersuisuini siulittaasutut ingerlaqqippoq, ukiunilu tulliuttuni siulersuisuni danskertatuaassalluni, siulersuisunngortut ukuupput:

• Stine Bosse, siulittaasoq
• Inaluk Malene Brandt
• Ulrik Blidorf
• Eqalunnguaq Abel Kristiansen
• Tukummeq Arneq Egede Martinsen
• Sulisunit toqqakkat pingasut

Aamma atuaruk: Tele-Post leverer stort overskud i 2020