Suka K. Frederiksen toquvoq

Siumut sinnerlugu politikeriusimasoq Suka K. Frederiksen piffissami sivitsortumi napparsimareerluni, angerlarsimaffimmini toquvoq. Ilaqutaasut Sermitsiaq.AG-mut taama uppernarsaapput.

Suka K Frederiksen Inatsisartunut 2014-imi qinigaavoq, 172-init taajuunneqarluni. 2018-imi qinigassanngorteqqissanani aalajangerpoq.

Naalakkersuisuni ilaasortaanermini Namminiilivinnermut, Nunanut allanut tunngasunut, Nunalerinermullu 2017 tikillugu naalakkersuisuusimavoq. Tunngaviusumillu inatsisissamut ataatsimiititaliarsuarmik siulliulluni aamma ivertitsilluni.

Oqqamigut kræfteqalersimalluni 2017-imi augustimi paasivaa.

Suka K. Frederiksen napparsimanini pissutigalugu sulinngiffeqassalluni aalajangerpoq, kræftimillu napparsimanini pillugu aviisimi AG-mi apersorneqarnermini ammasumik oqaluttuarpoq.

Suka kræfti pillugu atuakkiorpoq

Apersorneqarnermini ilisimatitsivoq kræftimik napparsimasunut ilaqutaasunullu atuagassiamik suliaqarluni:

- Kræftimik napparsimalerama kræftimut tunngasunik kalaallisut qanoq paasissutissanik ikitsigisunik peqartugut paasigakku pakatsissutigigakku. Kræfti pillugu atuagaaqqanik peqaraluarpormi, taakkuli kisitsisaanerupput paasissutissanik annerusumik imaqaratik, Suka K. Frederiksen augustimi 2018-imi aviisimut AG-mut kræftimik napparsimanini pillugu apersorneqarnermini oqarpoq.

Suliniuteqarluartoq

Suka - napparsimagaluarluniluunniit - Narsami suliniaqatigisani peqatigalugit atsiornernik katersivoq: Inuit napparsimasut oqaaseqartartussaminnik pisariaqartitsipput, taama nassuiaavoq.

- Napparsimasut oqaaseqartartoqalernissaat ujartorparput, napparsimasut sinnerlugit oqaaseqartarsinnaasumik. Oqaaseqartartussaq napparsimasup pisinnaatitaaffii aallaavigalugit sulissaaq, napparsimasullu soqutigisai saqqummiuttassallugit, Suka K. Frederiksen Sermitsiaq.AG-mit aprilimi 2019-imi apersorneqarnermini oqarpoq.

Anguniagaqartut: Napparsimasut oqaaseqartartoqalerusupput

Suka K. Frederiksen 55-inik ukioqalerpoq.