Anguniagaqartut: Napparsimasut oqaaseqartartoqalerusupput

Napparsimalernermi napparsimasoq ilerasuutissaqangaatsiartarpoq. Napparsimasoq piffissami sivisuumi nakorsarneqarnissaminik pisariaqartitsippat, napparsimasullu najukkani qimallugu nunami allami nakorsarneqartariaqalersimappat, ilerasuutit amerlanerusarput.

Ilerasuutilli misigisallu pillugit napparsimasoq nammineerluni oqaaseqarnissani ernumagisarpaa, assersuutigalugu suliffimminut siunissami uteqqikkumaarnissaminut oqaaseqarnissap akornutaanissaa ernumagisaramiuk.

Suka K. Frederiksen taama isumaqarpoq. Taassuma 2017-imi aggustimi kræftimik napparsimalersimalluni paasivaa.

- Napparsimasut oqaaseqartartoqalernissaat ujartorparput, napparsimasut sinnerlugit oqaaseqartarsinnaasumik. Oqaaseqartartussaq napparsimasup pisinnaatitaaffii aallaavigalugit sulissaaq, napparsimasullu soqutigisai saqqummiuttassallugit, Suka K. Frederiksen oqarpoq.

Sinniisussamik pisariaqartitsisut

Ukiuni kingullerni kisitsisit takutippaat kalaallit kræftimik napparsimalersartut amerliartortut. Nappaallu ilaatigut kingusinaartumik paasineqartarpoq, napparsimasoq peqqissinissaminut nakorsarneqarsinnaajunnaareertoq.

Kalaallit Nunaanni, 55.000-inik innuttaasoqartuni ukiumut 200-t missaat kræftimik napparsimalertarput, ukiumullu 110-t missaat kræftimik napparsimallutik toqusarlutik. Misissuinerup, Norgemi Haugesund Sykehusimi kræftertunut nakorsaanerup, Umbreen Yousafip suliaani inerniliunneqarpoq Kalaallit Nunaanni kræfterlutik toqusartut nunani avannarlernut allanut sanilliullugit marloriaammik amerlanerusut.

Kræft er mere dødelig i Grønland end i resten af Norden

Suka K. Frederiksen isumaqarpoq inuit piffissami sivisuumi nakorsarneqarnissaminnik pisariaqartitsilersimasut, soqutigisatik pillugit oqaaseqarsinnaasumik amigaateqartut.

- Kræftimik napparsimasuinnaanngitsut, aammali nappaatinik allanik nappaateqartut. Assersuutigalugu tartuluttut Danmarkimiittariaqartarput nakorsarneqarlutik. Peqqissartut illuanni ukiuni arlalinni najugaqartariaqartarput, ilaquttatik qimallugit, Suka K. Frederiksen oqaluttuarpoq.

Atsiornerit

Atsiornernik katersineq sapaatit akunnerit marluk missaanni suli ingerlanneqassaaq. Suka K. Frederiksen anguniagaqartut allat peqatigalugit Narsami ullumi peqqissuseq pillugu sammisassaqartitsivoq, atsioriartortoqarsinnaassallunilu. Sammisaqartitsineq ulloq nunarsuarmi peqqinnermut ulloritinneqartoq, apriilip arfineq-aappaat, eqqorlugu aaqqissuunneqarsimavoq.

- Neriuppunga napparsimasut pillugit oqaaseqartartoqalissasugut. Peqqinnissaqarfimmi aaqqiissutissanut iluaqutaasinnaavoq, napparsimasut isaanniit pissutsit ilisimasaqarfiginerulernissaanut periarfissaqalissammat, oqarpoq.

Atsiornernik katersineq naammasseriarpat, atsiornerit Peqqissutsimut Naalakkersuisumut ingerlateqqinneqassapput.

Atsioqataarusuttut ugguuna atsiorsinnaapput.