Aningaasanut inatsit
Aningaasanut inatsisissaq umiarsualivimmut nutaamut qulakkeerinnippoq
2018-imut aningaasanut inatsisissaq 11,2 millionit koruuninik sinneqartooruteqassaaq, aningaasaqarnermut naalakkersuisoq Aqqaluaq B. Egede ilisimatitsivoq.
Partiit naalakkersuisoqatigiit aningaasaqarnermut oqaaseqartartuisa akornanni pingasunngornermi unnukkut isumaqatigiissuteqartoqarpoq, atsiornerisigullu perorsaasut inunnillu isumaginninnermi siunnersuisutut najugaq qimannagu ilinniartunut aningaasanik qulakkeerinnittoqarpoq.
Kulturimut timersornermullu aningaasat amerlanerusut
Kulturimut timersornermullu aningaasaliisoqarnerulissaaq, peqatigisaanik aamma Uumannami nutaamik umiarsualiviortoqarnissaanut Qaanaamilu malinnut illersuusiortoqarnissaanut aningaasaliisoqassaaq.
Aamma aalisartunut piniartunullu siunnersuisoqarfimmut annertunerusunik tapiissuteqarnissaq kiisalu Tunumi aalisarnerup ineriartortinneqarnissaanut aalisakkanillu maannamut aalisarneqarsimanngitsunik misileraalluni aalisarnissat pingaartinneqartut, Aqqaluaq B. Egede ilisimatitsivoq.
Ataasinngornermi akuerineqassaaq
Aningaasanut inatsit inaarutaasumik ataasinngorpat akuerineqassaaq, tassani inatsit pingajussaaneerneqarluni suliarineqassaaq.
Aamma atuaruk: 2018-imut aningaasanut inatsit isumaqatigiissutigineqartoq