MIO-mit nalunaarusiaq
Nunaqarfik: Meeqqat maani kaanngillat
Upernaviup Kujalliup MIO-p nalunaarusiaa, inersimasut aningaasanoornerat pissutigalugu meeqqanik kaattoqarneranik oqaasertaqartoq ilisarisinnaanngilaa
Allaaserisaq marlunngornermi nalunaaqutaq 12.37 iluarsineqarpoq, nunaqarfinni taakkartorneqartuni marlunni MIO aningaasanoorajunnermik ajornartorsiorneraasutut kukkusumik allaqqammat
Meeqqat illersuisuata Aviâja Egede Lyngep Avannaani angalanermini, nunaqarfinni arlalinni inersimasut akornanni aningaasanoorajuttoqarneranik angalanermut nalunaarusiamini taakkartuivoq - kisiannili innuttaasut eqqarsaatiginerullugit nunaqarfiit sorliunerinik oqaaseqanngilaq.
MIO-p siuttua ilaatigut allappoq, angajoqqaat ilaat aningasanoorlutik annaasaqartangaaramik meeqqami nerisassaannulluunniit akissaaruttartut.
Uuma sapaatip-akunnerata siuliani, aviisip Sermitsiap tusarpaa ingammik Kullorsuarmi aamma Upernavik Kujallermi tamanna atugaasoq, kisianni Upernavik Kujallermi innuttaasut tamanna ilisarisinnaanngilaat.
Atuaruk: Nunaqarfiit marluk aningaasanoorumatunermik eqqugaanerluttut
Tusarniaanermik piumasaqartut
Nunaqarfimmi aqutsisuni ilaasortaq Pele Grim, siulittaasup tullia Roberth Josavessen, kommunefoged Iisaaq Christensen, atuarfimmi pisortaq Karen Karlsen, nakorsaatinik paarsisoq Agathe-Marie Grim Karlsen aamma allatsi Susanne Mørch, ajornartorsiutit tamakkua eqqaaneqartut nunaqarfimminni ilisarisinnaannginnerarpaat.
- Aningaasanoorajunnerup kingunerisaanik meeqqanik kaatsitsisoqanngilaq, ajuusaarutigaarpullu ataasiakkaanik taamaattoqarsimassappat, taakku nunaqarfimmi ataatsimeereerlutik tusagassiorfinnut nalunaarummi allapput nangillutillu:
MIO-p nunaqarfiit sorliit pineqarnersut isertuunniaraluarpai iluatsinngitsumilli.
- MIO nunaqarfinni illoqarfinnilu susassaqartunut tusarniaassasoq piumasaraarput. Piffissaq ajornarpat, oqallisissianik allakkatigut nassiussinermigut.
Atuaruk: Perorsaasut ilinniartitsisullu meeqqat illersuisuat taperserpaat
Pissakilliorneq
Taamaattorli nunaqarfimmi pissakilliortoqartanernera taakku isumaqatigiissutigaat.
- Annerusumik minnerusumillluunniit pissakilliortoqartarmat ilumoorpoq, pingaartumik inuussutissarsiornerup ajornarsinerani. Tamannali nunaqqatigiit ilaqutariillu annertuumik ikioqatigiinnerisigut anigorneqartarpoq, nunaqarfimmi aqutsisut taama allapput.
Meeqqat illersuisuata aasaanerani isornartorsiuineranik Sermitsiaq.AG-p allaaserisai uani atuakkit