Skip to main content

Inissaaleqisup paniata inissinneqarnissaa kommunip siunnersuutigigaa

Inissannik tunisinnaanngilatsigit, kisianni meeqqat angajoqqaarsianut paarisassanngortissinnaavarput. Nuummi innuttaasoq inissaaleqilersoq kommunimit taama ilisimatinneqarpoq

Nuummi innuttaasoq Esther Frederiksen Nuummi inissaaleqinerujussuup illoqarfimmi innuttaasunut kingunipiluinut assersuutissat kingullerpaat ilagiinnarpaat.

Esther Frederiksen suliffeerukkami taamalu aamma atorfimminut inigisaminik annaasaqarami paninilu 14-inik ukiulik aggustimi inissaaleqilerput, Nuuk TV ilanngutassiami oqaluttuarpoq.

Esther Frederiksenip initaarniarluni utaqqiffigisai inissiaatileqatigiiffiit Ini imaluunniit Iserit aqqutigalugit nutaamik initaartitsinissaq suli pisinnaaqqajanngimmat Kommuneqarfik Sermersooq attaveqarfigaa initaarniarluni. 

Paniata paarisassanngortinnissaa siunnersuutigigaat
Kommunili ikiuussinnaanngilaq, taarsiulluguli paniata 14-inik ukiullip paarisassanngortinnissaa neqeroorutigalugu.

- Sullissisup, pisortap naggataatigullu kommunimi politikerip oqarfigaanngam meeqqannut ilaqutariinnik angajoqqaarsiaasartunik nassaarsinnaallutik, Esther Frederiksen Nuuk TV-mut oqaluttuarpoq.

- Paniga qimassimanngisaannarsimavara paarisassanngortinneqarunilu ajoqutigiinnassavaa. Imigassamik ikiaroornartumilluunniit atornerluisuunngilanga, taamaattumik meeqqama allanut paaritinnissaa takorlooruminaatsittorujussuuara, nangilluni oqarpoq.

Paniata anaanami qimannissaa aamma kissaatiginngilaa:

Qiasoq
- Soorunami aliatsappoq qiallunilu. Naatsorsuutigisimanngikkaluarpaa uannit peerneqarnissani siunnersuutigissagaat (kommunip, aaqq.), Esther Frederiksen oqarpoq.

Kommunimillu meeqqamut pitsaanerusussap salliutillugu - meeqqammi angerlarsimaffissaaleqisussaanngimmata - eqqarsaatigineqarnera Esther Frederiksenip paasisinnaagaluaraa, meeqqani paarisassanngortikkusunngilaa.

Esther Frederiksen ullumikkut nutaamik suliffeqarpoq inissaaleqigaluarlunilu Nuummi najugaqaannarusulluni.

Ullumikkut Esther Frederiksen paninilu qatanngutimini inissiami sisamanik initalimmi arfineq-pingasunillu najugaqarfigineqartumi najugaqarput, sulilu nammineq paninilu inissaminnik pissarsiorlutik. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER