Skip to main content

Simon: Nalimmassaasoqarli

- Kommunit akornanni aningaasaqarnikkut naligiinnginnerujussuarmut naalakkersuisut aaqqiissuteqarnissaannut piffissanngorpoq, borgmester Simon Simonsen oqarpoq

Nunatsinni kommunini sisamani aningaasatigut periarfissat assigiinngippallaarujussuarnerat Kommune Kujallermi borgmesterip Siumumeersup Simon Simonsen kingumut uparuarpaa.

Tamanna oqallisissiami tulliutumi atuarneqarsinnaavoq:

”Kommunit assigiinnerusunik aningaasatigut atugaqarnissaat ataasiarata sakkortuumik naalakkersuisunut Kommune Kujallermit kajumissaarutigisarparput. Massakkut pissutsit taamtut itsillugit kommunit ataasiakkaat aningaasatigut periarfissaat assigiinngippallaarujussuaqaat.

Atugarissaarnerit atugarliornerillu
Kommunit isorliunerusut marluk kommuninit allanit marlunnit annerusumik akileraarfiusaraluarlutik taamaattoq uagut innuttatsinnut pitsaannginnerusunik atugassaqartitsivugut. Akileraarutitigut naligiissaarineq atuuttoq kommuninik atugarliornerusunik atugarissaarnerusunillu pilersitsisimavoq, kommunillu marluk innuttaat appasinnerusumik akisunerusumillu sullinneqarlutik.

Aaqqissugaanikkut ajornartorsiuteqarnerput pissutigalugu kommunini isorliunerusuni qanorluunniit aningaasartuutinik ikilisaatigigaluarutta akileraarutinillu qaffaatigigaluarutta nunatsinni sumiiffinni allanisulli ittunik innuttaasunut neqerooruteqarsinnaanngilagut.

Assersuutigalugu maani kommunitsini kommunip ingerlatsinera akissaqarfigiumalugu siorna ileqqaarujussuartariaqarsimavugut taarsigassarsisariaqarsimallutalu. Taamattaaq aamma 2013-imut missingersuutit aningaasassaqartinnissaat ajornartorsiutigissavarput. Siorna assersuutigalugu meeqqerivinni akiliutit qaffasinnerpaaffissaat atortariaqarsimavavut, ukiorlu manna taamaaliunnginnissarput sapinngisarput tamat ilungersuutigissavarput.

Oqaasiinnaasimapput - iliuuseqartoqarli
Naalakkersuisut tungaannit naligiissaarinerup massakkut atuuttup allanngortinneqarnissaa ammaffigineqartarsimavoq, maannamulli tamakku oqaasiinnaasimapput.

Naligiissaarineq pillugu kommuni tusarniaanermut akissuteqareersorlu naalakkersuisut siulittaasuat aammalu aningaasaqarnermut naalakkersuisoq neriorsuipput akileraarutitigut naligiissaarineq allanngortinneqassasoq, maannamulli tigussaasumik pisoqarsimanngilaq. Aammalumi aningaasanut inatsisissatut siunnersuummi imaluunniit Inatsisartut oqaluuserisassaanni tassunga tunngasumik nassaassaqanngilaq.

Innuttaasut nunatsinni sumiluunniit najugaqaraluarunik assigiimmik sullinneqarnissaannik neqeroorfigisinnaajumallugit kommunit akornanni aningaasaqarnikkut naligiinnginnerujussuarmut naalakkersuisut aaqqiissuteqarnissaannut piffissanngorpoq, Kommuni Kujalliup borgmesteria Simon Simonsen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER