Isiginnaartitsisartunngornissamik takorluugaqartoq
Aqqaneq-marlunnik ukiulik Arnajaraq Poulsen Tina Dickowip musikvideoliaani Nuummi immiunneqartumi inuttaavoq
- Inersimasunngoruma isiginnaartitsisartunngorusunneruvunga.
Taama aqqaneq-marlunnik ukiulik Arnajaraq Poulsen oqaluttuarpoq.
Tina Dickowip musikvideoliaani nutaami juunimi ullut pingasut ingerlaneranni Nuummi immiunneqartumi inuttaareersorlu Sermitsiaq.AG-mit aperineqarpoq sunngornissaminik takorluugaqarnersoq.
- Nuanneqaaq, kisianni aamma sakkortulaarpoq, atuartut arpatsinneqarneranni 18,5 kilometerinut arpaqqammerama, Arnajaraq Poulsen oqaluttuarpoq.
- Peqataaninni nuannernerpaavoq immummik tallikka kuineqarmata. Tamanna misilissimanngilara. Kamassimarpasilluni nikallungarpasillunilu aamma nuannerpoq.
Læs også "Nina producerede ny Dickow-video"
Arnajaraq Poulsenip angajuata Nina Paninnguaq Skydsbjerg Jacobsenip musikvideomik nikallungasumik suliarinnittup oqaluttuaraa, nukkani assut tulluusimaarutigigini, taannami isiginnaartitsinermini aqqaneq-marlunnik ukiulippassuunngitsut takutissinnaasaattut tunniusimalluarluni pisimammat.
- Illit nammineq isummat malillugu isiginnaartitsillaqqippit?
- Aap, taama isumaqarpunga. Uangaaginnarpungami imaluunniit oqarfigineqarnittut iliuinnarlunga, Arnajaraq Poulsen aasaanerani atuanngiffeqareeruni Nuummi Atuarfik Ukaliusami (USK) 7. klassimi atualersussaq akivoq.
Musikvideo erinnamut ”Moon To Let”-imut suliaavoq. Qallunaaq erinarsortartoq taalliortorlu nuannarineqarluartoq videomi ilaatigut Nuummi eqqaavissuarmi, Qapiarfiusaami Tuapannguanilu immiunneqartumi peqataanngilaq.
Musikvide maani takuuk imaluunniit takoqqiguk.