Skip to main content

Kalaallit filmiliaannik filmfestivali

Apriilimi Greenland Eyes kalaallit filmiinik Berlinimi filmfestivaleqartitsissaaq 

Greenland Eyes International Film Festival aaqqissuunneqarpoq filmiliornermi ilitsersuisumit Ivalo Frankimit, Nunatsinni inunngorsimasumit, maannalu Berlinimi najugaqartumit, aamma Lill-Ann Kooerber-imit, Humboldt Universitetimi Nordisk Institutsimeersumit. Festivali tapersersorneqarpoq Per Erik Vengimit, Berlinimi Den Danske Ambassade-meersumit ingerlanneqassallunilu Arsenal Cinema-mi, aamma Berlinalen-imik ingerlatsiviusartuji. Suliniut aningaasatigut tapiiffigineqarpoq Namminersorlutik Oqartussat Kulturimut Atugassiissutaannit. Kalaallit filmiinik filmfestivali ingerlanneqassaaq 2012-imi apriilip 24-iannit 30-iannut.

Festivali programmerpassualik suliarineqarsimavoq siunertaralugu filmit nunatsinneersut aammalu nunarput pillugu filmit kulturikkut paasititsiniutitut. Sapaatip akunnerani festivalip ingerlanerani Arsenalimi filmertarfimmi ullut tamaasa oqalugiartoqartassaaq isiginnaartitsisartullu oqaluttuartassallutik festivalimullu atatillugu kalaallit isiginnaartitsisartoq arnaq oqaluttuatoqqanillu oqaluttuartartoq Makka Kleist eqqumiitsuliortorlu Julie Edel Hardenberg qaaqquneqarsimapput, Hardenbergillu saqqummersitamigut Sapiitsut/Heroes kalaallit ulluinnarni sapiitsuliortartut filmimi plakatiusaartillugit nersorniarpai.
 

Aaqqissuussineq naggataarlugu festivalimik aaqqissuussisut kulturip illorsuani pisoqartarfimmilu Berlinip illoqarfiata qeqqaniittumi HCB-mi naggataartitsissapput, festertoqassalluni kalaalerlu erinarsortartoq Nive Nielsen nipilersortoralugu.
- Greenland Eyes aqqutigalugu inuit kalaallit ullumikkut inuiaqatigiivinik takunnissinnaapput, Kalaallit Nunaat inoqanngitsutut, sermermik qallersimasutut sorpassuartigullu "allanartunik eskimuulittut« takorloortagaq pinnagu, Ivalo Frank oqaluttuarpoq.
Ullumikkut Kalaallit Nunaanni, festivalimi filmini takuneqarsinnaasutut, pinngortitaq kulturilu, nunat alutornartut inillu nutaaliorfiit, puisinniarneq aamma Playstation imminnut akulerunneqarput.
- Minnerunngitsumillu nunarsuarmi ileqqut pisoqaanersaat, asseresuutigalugu tivaneq, ullutsinni kalaallinut inuusuttunut akulerutsinneqassapput, kalaallit inuusuttut mutinik, nipilersukkanik, siunissamut sinnattumikkut sunngiffimmilu sammisamikkut nunarsuarmi peqatitik assigalugit, taanna paasissutissiivoq.
- Greenland Eyes Kalaallit Nunaata inuusuttuinik isumalluartunik oqallittarfimmik pilersitserusuppoq, Ivalo Frank oqarpoq.
 

Filmitoqqat

Festivalimi filmit takutitassat tassaapput qanga nunatsinni filmiliarineqartarsimasut ullumikkullu filmiliarineqartartut, nunani tamalaani ilisimaneqarpianngitut, aaqqissuussisut paasissutissiippu8t.
Qanga filmiliatigut qallunaat tyskit 1900-ukkunni filmiliornermik oqaluttuarisaannik qaqutigoortumik takunnittoqarsinnaavoq, Kalaallit Nunaat sammineqartillugu takutinneqarsimanngisaannartut.
Ilaatigut tassaapput filmi quiasaarusiaq nipeqanngitsoq Das Eskimobaby (1918) Asta Nielsen kalaaleq arnartut pinaatsutut pingaarnertut inuttaralugu, tyskit-amerikarmiut filmiliaat SOS Iceberg (1933) Leni Riefenstahl timmisartortartutut inuttaralugu issittumi ilisimasassarsiortumik annaassisoq, filmilu aliikkutassiaq Paalup Nuliarsarnera (1934), taassumalu manuskriptianik allassimavoq qallunaaq-kalaaleq issittumi ilisimasassarsiortartoq tusaamasaq Knud Rasmussen.

Filmit nutaat

 Filmfestivalimili pingaarnerusumik sammineqassapput nunatsinni filmiliorfiuleraluttuinnartumi filmiliat nutaajunerpaat, nunarsuarmi tusaamasaalaalersimasut, Ivalo Frank oqarpoq.
Greenland Eyesimut atatillugu isiginnaariat Nunatsinnit Danmarkimillu filmilerisut pingaarutillit suleqatigalugit (ilitsersuisut, isiginnaartitsisartut, producerit, ilisimatuut) kalaallit filmiliaannik nutaajunerpaanik takunnissinnaapput, Ivalo Frank oqaluttuarpoq aperalunilu:
Ullumikkut kalaallit filmiliaat sukkut torrallaappat?
Filmiliortunut suut piumasaqaataappat?
Sunik sammisaqartarpat?
Kalaallit ileqqui nunarsuarmioqatigiinnilu popkulturi qanoq imminnut attuumassuteqarpat?

Nunatsinni ullutsinni filmiliat sammineqarnerannut atatillugu filmit arlallit takutinneqassapput kalaallinit inuusuttunut, angusaqarusuttunit sananeqarsimasut, Nunatsinnilu isiginnaarneqartarnermikkut rekordileereersut, Greenland Eyes-imulli atatillugu ilaat aatsaat nunani allani takuteqqaarneqartussat.

Ilaatigut takutinneqassaaq nunatsinni filmiliaq siulleq (Tikeq Qiterleq Mikileraq Eqeqqoq, 2008, kitaani nunaqarfimmi ineriartornermik oqaluttuaq, filmi aliikkutassiaq siulleq nunani tamalaani filmertarfinnut sammitinneqartoq (Nuummioq, 2009) kiisalu quiasaarusiaq kalaallit "Borat"-iattut taaneqartoq (Hinnarik Sinnattunilu, 2010).
Filmit nalissaqanngitsumik misigisassat ilaqartinneqassapput nunat tamalaat filmiliaannik, sammisamut attuumassutilinnik, ilaatigut naatsumik filmiliaq Qaanaaq (2008j), Nicole Pagliap filmiliaa, tassani sorsunnerup nillertup avanersuarmiunut sunniutai oqaluttuarineqarlutik.
Tamatumunnga atatillugu filmi Inuk ujarneqarsinnaavoq, nunarsuarmi sumi tamaani filmfestivalini maanna nersornaaserneqaqattaartoq. Kingullermik Australiami Alaskamilu.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER