Nivi Olsenip KAK taperserpaa: Pissartanngorniutivinnerit soorunami ingerlassinnaavagut
Demokraatit sinnerlugit Inatsisartuni ilaasortaq, Nivi Olsen, KAK-ip, Kalaallit Arsartartut Kattuffiat, Namminersorlutik Oqartussanik pissartanngorniutivinnissat pillugit oqaloqatiginninniarsarinera pillugu tapersiivoq.
Pissutsit maannatut itsillugit, isikkamik arsarluni pissartanngorniuttoqarsinnaanngilaq. Tassami aaqqissuussat inuit katersuuffigisaat silami inuit amerlanerpaamik 250-iussappiut, illup iluanilu 100-ssallutik.
Demokraatili sinnerlugu Nivi Olsenip arsaq pillugu oqallinneq ingerlateqqippaa:
- Nunatsinni corona atuutinngilaq. Nunani allani corona atuukkaluartoq arsaannerit ingerlapput. Soorunami mianersortumik maleruagassanullu ataqqinnittumik. Taamaattumik aamma uagut Nunatsinni pissartanngorniutivinnerit soorunami ingerlassinnaavagut, Nivi Olsen tusagassiorfinnut nalunaaruteqarluni oqarpoq.
Ersarissumik nalunaarneq
Nivi Olsenip pissartanngorniutivittoqarnissamut periarfissanik ujaasilluni KAK-ip oqaloqatiginninniarsarinera taperserpaa.
Politikerip erseqqissarpaa politikkikkut kissaatigineqarsimanngisaannartoq timersorneq sutigulluunniit aporfilersorneqarnissaa.
- Arsaattartorpassuit piareersarluarnikut pissamaaqisullu nalornisinneqarnerat akuerisinnaanngilara. Timersorneq illersorpara, politikereqatikkalu susassaqartullu tamaasa kaammattorpakka piaartumik ersarittumik nalunaaruteqartoqarnissaa, oqarpoq.
Angutit isikkamik arsaallutik pissartanngorniunnissaat Ilulissani pisussatut pilersaarutaagaluarpoq, klubbit arfineq-pingasut unammissallutik. Arnat Nuummi pissartanngorniutivissapput, aamma klubbit arfineq-pingasut nalunaarsimallutik.
