KAK: Corona pillugu sulisoqatigiit timersortartunik ilaginnaapput
Arsaattartut Kattuffiata KAK-p pakatsissutigisimavaa, Namminersorlutik Oqartussani Corona pillugu sulisoqatigiit kattuffimmik naapitserusussimannginnerat, tassani arsamik Kalaallit Nunaanni pissartanngorniunnissap ingerlanneqarsinnaaneranut aaqqiissutissarsiortoqarsinnaammat.
Corona pillugu sulisoqatigiit allattoqarfiata timersortartut timersortartullu aaqqissuussaminnik assigiinngitsunik ingerlatsiniarnerminni unammilligassaqarnerat soorlumi susassarinngikkai. Arsaattarfut Kattuffiannit taamatut misigisimasoqarpoq.
Ullumikkut katersuuteqqusaannginnerup KAK-p arsamik Kalaallit Nunaanni pissartanngorniutsitsiniarnera akornuseqqavaa, tamannalu pakatsissutaasimaqaaq, Coronami pillugu sulisoqatigiit allattoqarfianik ataatsimeeqateqarniarsineq iluatsinneqarsimanngilaq.
- Upernaaq ajornartorsiorneq aallartimmat KAK suliniuteqapallassimavoq, Namminersorlutillu Oqartussanit nalunaarutigineqartunik malinninniarluni aalajangiipallassimalluni. Piaartumik iliuuseqarsimavugut, ilaasortatsinnullu atassuteqarniarnermut ikiuussimaqaluta, nuanninngitsunik pisariaqartunillu upernaami sammisassarpassuarnik unitsisiinnarnissamik futsalimilu Nuna tamakkerlugu pissartanngorniuttoqarnissaanik taamaatitsiinnarnissamik aalajangiussaqarsimalluta, arsaattartut kattuffiani KAK-mi siulittaasoq, eqqartuussissuserisoq Finn Meinel ilisimatitsivoq.
Makitaniarpasittutut suleriaaseqarneq
- Silami illullu iluani unammisaqattaarnissat ilaasa ingerlanneqarsinnaanerat siunertaralugu, Corona pillugu sulisoqatigiit allattoqarfiat ataatsimeeqatiniartarsimagalaurparput, tuniluunnerup siaruaassinnaanerata annikinnerpaaffianiitinneqarnissaanut aaqqiissutissaasinnaasunik oqaloqatigiumallugit. Ataatsimeeqateqarnissamik kissaatigisat soqutigineqanngikkaagamik itigartisissutigineqartarsimapput. Aaqqiissutissarsiorluni oqaloqatigiinnissamut piumassuseqannginneq aamma makitaniarpaluttutu suleriaaseqartoqarnera pakatsissutigisimaqaavut, Finn Meinel erseqqissaavoq.
Tassa KAK silami arsamik pissartarnngorniutsitsisinnaanngilaq, aamma ukiamut arsamik pissartanngorniutsitsisinnaanngilaq, oqartussat kommunit killeqarfii akimorlugit unammiuaartitseqqusinnginnerat pissutigalugu.
- Corona pillugu sulisoqatigiit allattoqarfiata suleriaasia pakatsissutigeqalugulu puaatsoorfigisimaqaarput. Aaqqiissutissarsiorluta suliaqarnerput ingerlatiinnarusukkaluarparput, Coronali pillugu sulisoqatigiit allattoqarfianit pimoorussisumik oqaloqatigineqarnissarput pisariaqartipparput, arsaattartut kattuffiani siulittaasoq, neriuuteqartoq Corona pillugu sulisoqatigiit allattoqarfianit naapeqateqarluni aaqqiissutissarsiortoqarnissaanik kissaateqartoq oqarpoq.
Nunani allani allatut aaqqiissutissarsisoqarsimasoq
Europami nunat arlallit immikkut ittumik aaqqiissutissarsisimapput, tassa nunani pineqartuni coronap tuniluussinnaanera pissutigalugu inuit aalajangersimasumik amerlassusillit katersuussinnaanerannut assigiinngitsunik piumasaqaateqartoqaraluartoq, tuusintilikkaanik isiginnaartoqarluni arsaannermik ingerlatsisoqarsinnaanngorsimavoq.