Neqi A/S: Toqoraaviup aaqqissuussaanera piginnittaalu annertuumik allanngortinneqassapput
Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund (IA) ammasumik oqaluttuarpoq Neqi A/S annertuumik allanngortinneqassasoq, maannalu inuussutissarsiutinik ingerlataqartut namminersortut piginneqataasinnaalernissaat neqeroorutigineqartussanngortoq.
Kalistat Lund (IA) upperinnippoq Neqi A/S siunissaqartoq. Taamaattorli erseqqissaavoq ullumikkutut iluseqarluni ingerlaqqissinnaanngitsoq:
- Assut ajuusaarnarpoq suliffeqarfik nunalerinermik inuussutissarsiuteqartunut aammalu minnerunngitsumik inuiaqatigiinnut tamanut taamak pingaaruteqartigisoq KNI-p tungaanit ukiuni qulikkaani peqquserluttoqarneratigut taamak annertutigisumik eqqugaasimammat, Kalistat Lund oqarpoq nangillunilu:
- Tassa piffissami taamak sivisutigisumi ilisimasimanngilarput ingerlatseqatigiiffik piviusumik qanoq ingerlanersoq qanorlu angusaqartarnersoq, tassunga pissutaavoq KNI-p tungaanit pilersaarusiukkamik ataqatigiissaakkamillu ingerlatseqatigiiffiup naatsorsuutai peqquserlunnikkut pinnersarneqartarsimammata, Kalistat Lund Sermitsiaq.AG-mut oqarpoq nangillunilu:
- Tupinnartualu tassaavoq ukiuni taamak amerlatigisuni arlaannaalluunniit pasitsassimanngimmat, aatsaat kinaassutsiminik isertuussilluni pissutsit qanoq innerinik oqaluttuartup oqaluttuaa paasiniarneqalermat paasineqarpoq ilumut pissutsit taamak ingerlasimasut. Tassa ukioq naatsorsuusiorfik takkutilersorlu aningaasanik KNI-miit Neqimut nuussisoqartarsimavoq, naatsorsuinerlu pereeraangat aningaasat KNI-mut utertinneqartarsimallutik, taamaalillunilu takuneqarsinnaajunnaarsarneqarsimavoq Neqi A/S piviusumik qanoq ingerlanersoq, isumaqalersitsisoqarsimavorlu Neqi A/S amigartoortaraluarluni ajunngitsumik ingerlasoq, Kalistat Lund nassuiaavoq.
Suleqatigiissitaq aaqqiissutissanik siunnersuusiorpoq
Peqquserlulluni kisitsinik allanngortiterisoqartarsimanerata kingunerisaanik aammalu susoqarpiartarsimaneranik misissuisitsinerup kingunerisaanik ingerlatseqatigiiffik pillugu misissuinerit sukumiinerusut ingerlanneqarput:
- Pingaaruteqarpoq kisitsit paasissutissallu eqqortut tunngavigineqarnissaat aammalu ingerlatseqatigiiffiup killiffiata paasineqarnissaa siunissaa pillugu oqaluuserilertinnagu. Naalakkersuisunit suleqatigiissitamik pilersitsinikuuvugut sunik tamanik qulaajaallunilu ingerlatseqatigiiffiup siunissaa pillugu siunnersuusiortussanik. Tassa suleqatigiissitap innersuussuteqarnissaa ilanngullugu aalajangiunnikuuarput, taamaalilluta piviusorsiortumik ingerlatseqatigiiffiup siunissaa ilusilersorsinnaaniassagatsigu, Kalistat Lund Sermitsiaq.AG-mut oqaluttuarpoq.
Peqquserluttoqarneratigut kusassaanerit
Naalakkersuisoq Kalistat Lund (IA) innersuussivoq Naalakkersuisut paasissutissat pigisaat qularutissaanngitsumik ersersitsisut peqquserluttoqarneratigut kusassaasoqartarsimasoq, taamaammallu pissusissamisuussasoq peqquserluuteqarsimasut akisussaatinneqarnissaat.
Kalistat Lund isumaqarluinnarpoq ingerlatseqatigiiffiup aaqqissuussaanera aammalu piginnittui eqqortumik aaqqiivigineqarsinnaappata, Neqi A/S-ip siunissaa qulakkeerniarneqarsinnaasoq aammalu siunissami ingerlatseqatigiiffik taanna suliffissaqartitsiniarfittuinnaq atorunnaarsinneqassasoq:
- Peqquserlulluni kisitsisinik allanngortiterisarneq akuersaarneqarsinnaanngilaq, pinerlunneruvoq aammalu naatsorsuutigaara pisimasup immikkuualuttortai tamarmik qaqilerneqassasut akisussaasoqartitsissasorlu, Kalistat Lund oqarpoq nangillunilu:
- Naalakkersuisunut pingaaruteqarpoq erseqqissaatigissallugu, savaatillit allatullu nunalerinermik ingerlataqartut pisumi matumani mamianartuliami ukiuni arlalissuarni ingerlasimasumi minnerpaamilluunniit attuumassuteqanngimmata, ajoraluartumilli maluginiarparput innuttaaqatitta ilaasa nunalerinermik inuussutissarsiuteqartortavut pisooqataasimasutut inissinniartalersimagaat. Tassunga tunngatillugu erseqqissaatigissavara qulaajaaneq sapinngisamik ammasumik ingerlanneqassasoq naatsorsuutigigatsigu, tassami nunalerinermik inuussutissarsiuteqartortavut sussuseqanngitsut ilanngullugit pisuutinniarneqarnerat pissutissaqanngilaq, Kalistat Lund erseqqissaavoq.
Neqi A/S siunissaqartoq upperivaa
Tassa Neqi A/S pillugu suleqatigiissitamik Naalakkersuisut sulisitsipput, kingusinnerusukkut qulaajaanerit naammassippata aammalu toqoraaviup siunissaa qanoq anillariarfissaqarnersoq ilanngullugu innersuussuteqartoqareerpat allanngortilluinnarlugu ingerlanneqalernissaa siunniunneqassasoq aammalu tassunga atatillugu namminersortunik piginneqataajumasunik piginneqateqalersinnaaneq pillugu innersuusisoqassaaq:
- Ingerlatseqatigiiffiup aaqqissuussaanera patajaatsoq tunngavigalugu aammalu neriuppunga piginnittut eqqortut nassaarinerisigut, toqoraavik siunissaqarluartinneqarsinnaavoq maannamullu ingerlatsinerliortoqarsimanera anigorlugu siunissamut ilusissaa ilusilersorneqarumaarpoq. Taamaammat aamma suleqatigiissitaq misissuitipparput pisortat namminersortullu piginneqatigiillutik ingerlatseqatigiiffimmik qanoq ingerlatsisinnaanersut, neriuutigaaralu namminersorlutik suliffeqarfiutillit ammajumaartut Neqi A/S-ip siunissaa pillugu suleqatigiinnissamut, Kalistat Lund oqarpoq.
Piviusorli tassaavoq KNI A/S suli Neqi A/S-mik piginnittut, inuiaqatigiit, sinnerlugit aqutsimmat.
Sermitsiaq.AG-mit sapaatip akunnerata siuliani oqaluttuaraarput KNI-p Neqi A/S akiitsuinik 142,5 millioner koruuninik isumakkeerfigisimagaa.
Qularutissaanngilaq namminersorlutik inuussutissarsiuteqartut ingerlatseqatigiiffimmik amigartooruteqarfiusumik ingerlanneqartumik aammalu kisitsisinik kusassaalluni peqquserluuteqartoqaratigut tusaamaneqarnermigut innarlerneqarsimasumik piginneqataanissaminnut soqutiginnissanersut.