Imminut pilersorneq: Neqip siunissaa isumaqatigiinniutigineqartoq
Narsami savaaqqanik toqoraavik amigartooruteqarpoq KNI-lu toqoraavimmik piginnittoq ilungersuatinneqarluni. Maannakkorpiaq siunissaq pillugu KNI Naalakkersuisunut isumaqatigiinniarpoq.
Narsami savaaqqanik toqoraavik Neqi amigartooruteqarfiusumik ingerlanneqarpoq – ukiorpassuarnilu taamaalluni.
Taamak allaaserinnippoq aviisi Sermitsiaq.
- Tamanna ilungersunarluinnarpoq, Jeppe Jensen, KNI-mi Neqimik piginnittumi pisortaasoq, oqarpoq.
Aggustip aallartinnerani KNI-p ataatsimeersuarnerani pisortaq nalunaarpoq, Neqip akiitsui isumakkeerneqarsimasut taamaalillunilu ingerlanneqarnera patajaallilluni maannamullu qulakkeerneqarallarluni.
Aningaasat ikittuinnaanngillat. Neqip ukiumut naatsorsuusiorfia apriilimiit apriilimut ingerlasoq 2022/23-mi 2,5 millionit sinnerlugit amigartoorfiuvoq namminerlu aningaasaatitigut 133 million koruuningajannik amigartoorluni.
Amigartoorneq attanneqarsinnaanngitsoq
- Soorunami taama annertutigisumik amigartoorneq attanneqarsinnaanngilaq, taamaattumik siorna ukiakkulli Nunalerinermut, Imminut pilersornermut, Nukissiornermut Avatangiisinullu Naalakkersuisoqarfik peqatigalugu Neqimut kiffartuussinissamut isumaqatigiissusiornissarput aallarnisarparput, Jeppe Jensen oqarpoq.
- Naatsorsuutigaarput kiffartuussinissamut isumaqatigiissut inissingajalersoq - kingusinnerpaamillu aappaagu apriilip aallaqqaataani ukioq naatsorsuusiorfik naappat. Taamaaliornikkut toqoraavik aningaasatigut periarfissarinnerulissaaq. Taamaanngippat pissutsit taamaattut attanneqarsinnaanngillat.
Maannakkut kiffartuussinissamut isumaqatigiissummi akileraartartut Neqip ingerlanneqarneranut ukiumut 5 aamma 13 million koruunit akornanni aningaasaliisarput.
- Neqimi ilungersunartut ilagisimavaat ukiorpassuarni naatsorsuutit eqqortuusimannginnerat KNI-mi naatsorsuusiornikkut uukapaatitsiniaaneq peqqutigalugu. Pigisat – illuutit maskiinallu – naleqarpallaarujussuartutut naatsorsuutini ikkunneqarsimapput nalikilliliinissaq isumagineqarani. Maanna taakku aqulerpavut, naatsorsuutillu eqqortut atorsinnaalerlutigit. Taamaattumik Naalakkersuisunut isumaqatigiinniarnissamut pitsaasumik tunngavissaqarpugut.
Savaaqqat amigaataasut
- Ilungersunartoq alla maannakkorpiaq iliuuseqarfigisinnaanngisarput tassaasimavoq savaaqqat tunineqartut. Maannakkorpiaq savaaqqat 20.000-iusarput naak toqoraavik 30.000-nik naammassisaqarsinnaagaluartoq. Siusinnerusukkut tamanna aaqqinniarlugu ilaatigut Islandimit savaaqqat neqaanik pisisarsimavugut, taamaaliorsinnaajunnaarpugulli, Islandimi aamma savaaqqat tunineqartut ikilisimammata.
