Neqeroorut: Smartphone atorlugu ussersorluni oqalutseqarneq
Tusilartut aappaagumiit tusilartut ussersuutaannut, assersuutigalugu smartphone atorlugu oqalutseqarnissamut neqeroorfigineqarsinnaanissartik naatsorsuutigissavaat, Naalakkersuisut taama ilisimatitsipput.
Inuit innarluutillit illersuisuata maani nunatsinni tusilartut ussersuutaanut oqalutseqarnissamut tusilartut periarfissaat isornartorsiornikuuaa.
Oqalutseqarneq nakorsiarnermut imaluunniit kommunimi ataatsimiinnermut atatillugu pingaaruteqarsinnaavoq. Naalakkersuisut maanna ajornartorsiummut iluarseeqataasussamik iliuusissamik nalunaaruteqarput.
- Tusilartut ussersuutaannut oqalutsissaqanngippat innuttaasut tusilartut immikkoortinneqaratarsinnaapput.
- Nunatsinni innuttaasunut tusilartunut ungasianiit oqaluttaasarnissamut Pissassarfiup isumaqatigiissuteqarfigineqarsimanera nuannaarutigalugu oqaluttuarisinnaavara, isumaginninnermut, ilaqutariinnut inatsisinillu atuutsitsinermut naalakkersuisoq, Martha Abelsen tusagassiuutinut nalunaarummi taama oqarpoq.
Pisortat suliffeqarfii innuttaasullu inniminniisinnaapput
Naalakkersuisup oqarnera naapertorlugu, ungasianiit oqaluttaaneq eqaatsumik digitalimillu attaveqaqatigiinnikkut aaqqiissutaavoq, assersuutigalugu smartphone atorlugu tusilartut ussersuutaannut oqalutseqarnissamik periarfissiisoq.
Isumaqatigiissuteqarnikkut peqqinnissaqarfik aamma pisortat suliffeqarfii allat, aammalu innuttaasut ataasiakkaat uangasianiit oqalutseqarnissamik inniminniisinnaanngussapput.
Pissassarfiup iluarsisassat kingulliit inissitsiterlugit maanna suliarai, aaqqiissutillu 2021-mi ukiup affaani siullermi atorneqarsinnaalernissaa naatsorsuutigalugu.