Tilioq: Tusilartut naammaginartumik ikiorserneqarneq ajorput

Ussersorlutik nutserisinnaasut amingaataasorujussuupput, tamatumalu malitsigisaanik tusilartut inuiaqatigiinni peqataatinneqartaratik, Innarluutillit illersuisuat naliliivoq.

Innarluutillit pillugit inatsit nutaaq ukiup matuma aallartinnerani atuutsinneqalersoq, ilaatigut tusilartunut amerlanerusunik pisinnaatitaaffiliivoq.

Oqartussalli ikiorsiissutissanik tunniussiniarnermik ajornartorsiuteqarput.

- Kalaallit Nunaanni ussersorlutik nutserisinnaasut amingaataasorujussuupput, Sisimiuni ussersorluni oqaasilik Lulu Reimer Geisler tusagassiorfinnut nalunaaruteqarnermi oqarpoq.

Innarluutillit illersuisuat Christina Johnsen naapertorlugu, Kalaallit Nunaanni ussersorluni nutserisarfimmik pisortatigoortumik attavigisinnaasaanik soqanngilaq, soorlu kommunimut imaluunniit peqqinnissaqarfimmut saaffiginnissaguni imaluunniit inuiaqatigiinni sammisassanut arlaannut peqataaniaraangami .

Allaanerusutut pissusilersorfigineqartartut

Lulu Reimerilu pitsaanerusumik ikiorserneqarnissamik pisariaqartitsisuni kisimiinngilaq:

- Allaanerusutut isigineqarlutik pissusilersorfigineqartarput, soorlu suliffeqarnermi peqataajuminaatitsisarput. Uffa massa tusilartut allarpassuarnik piginnaasaqaraluartut kisianni tusaasaqarsinnaanngiinnarlutik.

- Inunnik sullissisoq nangilluni oqarpoq, tusilartut kommunimit tapersersorneqaratillu ikiorneqartanngitsut, tassa ussersorlutik oqaloqatigiissinnaasannginnamik nutserisoqartaratillu. Mobilimi sulianik ingerlatsisumut allaqattaartarput imaluunnit pappiaqqamut allattuillutik, Innarluutillit illersuisuat allappoq.

Tusilartut ikiorserneqartannginnamik inuiaqatigiinni peqataasinnaasanngillat, Tusilartut kattuffianni siulittaasoq erseqqissaavoq:

Pissutsit ajorseriarsimasut

- Tusilartut allatuulli sammisaqartitsinernut peqataanissaminut pisinnaatitaapput, soorlu atuarfiup peqqinnissaqarfiullu avataatigut. Inuk tusaasaqanngitsoq aamma tarnip pissusaanik ilisimasalimmik oqaloqateqarnissani pisariaqartissinnaavaa, suliffissarsiornermi sulilernissamut apersorneqarluni, atuarfimmiluunniit angajoqqaat ataatsimiisinneqarnerannut peqataalluni, isumasioqatigiittuni ataatsimiittuni pikkorissarnerniluunniit peqataalluni. Sooruna Kalaallit Nunaanni ussersorluni nutserisinnaasunik periarfissaqanngitsoq? Kalaallit Tusilartut kattuffianni siulittaasoq Lisa Nielsen aperivoq.

Innarluutillit illersuisuata oqaatigaa, Kalaallit Nunaat FN-ip innarluutillit pillugit isumaqatigissutaa aqqutigalugu innarluutillit atugaannik pitsanngorsaanissamut pisussaaffeqartoq, innarluutillilli illersuisuat isumaqarpoq, Kalaallit Nunaanni tusilartunut tamanna killormut ingerlasoq:

- Tusilartut eqqarsaatigalugit Tiliumiit isumaqarpugut, tusilartunut atuarfiup 2008-imi matuneraniit pissutsit arriitsumik ajorsiartuinnaavissimasut, Innarluutillit illersuisuat allappoq.

Powered by Labrador CMS