Nakuusernerit pillugit kisitsisit kingorna: Piffissat imigassamik nioqquteqarfiusut immaqa allanngortinneqassapput
Naalakkersuisoq inatsimmik siunnersuuteqarnissamik suliamik aallartitsivoq, taanna piffissat tuniniaaffiusartut pillugit inatsimmi allanngortoqannginnerani politikkikkut naliliisoqannginnerani siunnersuuteqassaaq.
Nakuuserneq imigassartorsimatilluni annermik pisartoq, arfininngornerup unnuaani pinerusarpoq.
Kalaallit Nunaanni Politiit ukiumoortumik nalunaarutaanni kisitsisini tamanna takuneqarsinnaavoq. Kisianni politiit pisortaata Bjørn Bayip oqarnera naapertorlugu, nakuusernerit nalunaarutigineqartartut ikilisinneqarnissaannut iliuusissaqarpoq. Piffissap imigassamik tuniniaaffiusartup allanngortinneqarnissaa assersuutigalugu periarfissaasinnaavoq, taanna isumaqarpoq.
Taamatut oqariartuuteqarneq Sermitsiaq.AG-p meeqqanut, inuusuttunut, ilaqutariinnut peqqissutsimullu naalakkersuisumut, Mimi Karlsenimut saqqummiuppaa.
Taanna sinnerlugu, ilinniartitaanermut, kultureqarnermut, timersornermut ilageeqarnermullu naalakkersuisoq Peter P. Olsen, allagaqarluni akissuteqarpoq:
- Mimi Karlsen atorfilittaqarneq aqqutigalugu ilaatigut imigassaq pillugu inatsisip nutarterneqarnissaanik suliamik aallartitsinikuuvoq.
Politikkikkut isumaliutit
Suleqatigiissitanik ulluinnarni atuuffimminni innuttaasut imigassamik nikotinimillu atuinerannik tunngasunik suliaqartunut ataatsimeeqateqarnissamut aggersaasoqarsimasoq, naalakkersuisoq ilisimatitsivoq.
Taakku suliamut atatillugu isigisaannit inatsisip maanna atuuttup naleqqussarnissaanut suut tulluarnersut siunnersuuteqarnissaat tassani siunertaavoq. Ilaatigut Allorfimmit, Paarisamit aamma Kalaallit Nunaanni Politiinit allaniillu sulisitat pineqarput.
Naalakkersuisut siunnersuutit ataasiakkaat pissarsiarereerpatigit peqqissutsimillu suliaqartut inassuteqaatit peqatigitillugit, piffissat tuniniaaffiusartut pillugit inatsimmi allannguisoqassanersoq politikkikkut naliliisoqarniarpoq, kiisalu suliniutit allat tulluartut atorneqarsinnaanersut nalilerneqassalluni.
Sukaterinerit nutaajunngitsut
Inatsimmik allannguineq kisimi atorsinnaanngilaq, Peter P. Olsen allappoq.
Suliniutigineqarsinnaasut misissorluarneqareerpata, Mimi Karlsenip Naalakkersuisut sinneri peqatigalugit, nakuusertoqarneranik nalunaarutiginnittarnerit arfininngornikkut pinerusartut pillugit unammilligassat ikilisinneqarnissaannik aaqqiissuteqarnissamut qanoq iliortoqassanersoq aalajangiissapput.
2018-imi Naalakkersuisut imigassaq pillugu inatsit sukaterlugu misiliipput, ukiumilu tulliani akerliunerit aamma Demokraatit sakkortuumik akerlilersuinerat pissutigalugit sakkukilleqqinneqarpoq.
