Nakorsaaneq: Akiuussutissalerneqanngitsut misissortittariaqavipput
Nuummi tunillatsissimasut arlallit illoqarfiup iluani sumiiffinni arlalinniissimanerisa kinguneranik innuttaasut misissortinnissamut kaammattorneqarput. Akiuussutissalertissimanngitsulli misissortinnissaat pingaaruteqarluinnartoq, kaammattuutigineqarpoq.
Nuummi innuttaasut sapaatip akunnerata siuliani sumiiffinni aalajangersimasuniissimasut oqartussanit kaammattorneqarput coronavirusimut misissorteqqullugit.
Nunatsinni Covid-19-imik tunillatsissimasut 29-iupput. Taakkunannga qulit Nuummi paasineqarput. Nuummilu paasineqartuni eqimattat pingasut qanoq tunillatsissimanersut ilisimaneqanngilaq.
- Pissutsit maannakkutut itsillugit tunillaassuunneq annertusiartorpoq. Nuummi pissutsit allaanerulaarput. Tassami tunillaassuunneq ikinnerpaamik pingasunit ilisimanngisatsinnit aallaaveqarpoq. Tunillatsissimasut taakku imminnut attuumassuteqanngivipput. Tunillaassuuttoqarsinnaavoq suli ilisimalersimanngisatsinnik, nunatta nakorsaanera Henrik L. Hansen ataasinngornermi tusagassiortunik katersortitsinermi oqarpoq.
Tunillatsinnissamut aarlerinartorsiornerusut
Nuummi tunillatsissimasut amerlanersaat piffissami 10.-17. juli sumiiffinni arlalinniissimapput. Tassa Nuussuarmi Brugseni Natalies, Pisiffik Qinngorput, FitnessGL sullorsuup eqqaani, Cafe Iggu, imerniartarfik Aurum aamma cafeteriami Igaffimmi.
Tunillaassuunnerup aqunneqarnerulernissaa anguniarlugu Nuummi innuttaasut sumiiffinni taaneqarsimasuniissimasut misissortikkiartoqquneqarput. Eqimattalli aalajangersimaqqissaartut misissortinnissaat, oqartussanit soqutigineqarluinnarpoq:
- Akiuussutissalertinneqanngitsut pingaarnermik. Akiuussutissalerneqanngitsut tunillatsinnissaminnut aarlerinartorsiornerupput, tunillatsissimagunillu aamma tunillaajanerullutik, Henrik L. Hansen oqarpoq.
Kisitsisit kingulliit takutippaat Nuummi innuttaasut 18-iniit qummut ukiullit 3.500-t suli akiuussutissalertissimanngitsut.
- Taava sumiiffinniissimasut ataasiarlutillu akiuussutissamik kapitissimasut. Taakku aamma suli aarlerinartorsiortutut taaneqarsinnaapput, sulimi tunillatsissinnaagamik, oqarpoq.
Henrik L. Hansen nassuiaavoq innuttaasut naammassillutik akiuussutissalertissimasut, sumiiffinnilu tunillatsissimasut ornissimasaanniissimasut tunillatsinnissamut aarlerinartorsiornerat annikitsuaraararsuusoq. Tunillatsissimagaluarunillu allanut tunillaaqqinnissaat suli ilimanaateqannginnerusoq.
Nuummi innuttaasunik misissuinerit ullumi ataasinngornermi aallartipput. Misissuinissamut neqeroorut arfininngorneq ilanngullugu atuutissaaq. Misissuisarfik ullumi aqagulu nalunaaqutaq 12.30-15.30 ammassasoq Kommuneqarfik Sermersooq nalunaarpoq. Pingasunngornermiit arfininngorneq ilanngullugu 12.30-14.00 ammatinneqarumaarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...