Skip to main content

Piumasaqaat nutaaq: Akiuussutissalertissimasut kisimik angalasinnaapput

Nuummi tuniluuttoqarmat oqartussat qisuariarlutik piumasaqaatigaat, inuit minnerpaamik ataasiarlutik akiuussutissalertissimasut kisimik kikkunnik tamanik angallassissutinik atuisinnaanerat.

Coronamut atatillugu angalasunut piumasaqaatit nutaat unnuap-qeqqaniit atuutilersut, Naalakkersuisut Siulittaasuat Múte B. Egede siuttoralugu ataasinngornermi tusagassiortunik katersortitsinermi saqqummiunneqarput, coronap tuniluunneranik akiuiniarluni suliniutit nutaat taakku partiini allani siulittaasunit taperserneqarsimapput.

Inunnut kikkut tamarmik ilaaffigisinnaasaannik atuiniartunut akiuussutissalertissimanissamik piumasaqaatip malitsigisaanik, Qaqortumiit Sisimiuniillu angalaqqusinnginneq unnuap-qeqqaniit atorunnaarsinneqarpoq.

Naalakkersuisut Siulittaasuata Múte B. Egedep nassuerutigaa iliuusissat sukannersuusut, tunillatsissimasulli amerlammata tamanna pisariaqarnerarpaa, aamma tuniluuttoqarnera unitsinniarlugu annertuumik suliaqartoqarnerarpaa.

- Tamatta akisussaaffimmik tigusisariaqarpugut mianersorlutalu, Deltami siusinnerusukkut Covid-19-imik tuniluutipallannerusoq pineqarnersoq suli naluarput, Múte B. Egede innuttaasorpassuit akiuussutissalertinnissamut akuersaarsimanerannik qujassuteqartoq oqarpoq.

Isiinnarluni akiuussutissalertissinnaaneq sulissutigineqartoq

Aamma illoqarfinni tamani isiinnarluni akiuussutissalersuisinnaaneq pisortanit sulissutigineqarpoq.

Kikkut tamarmik ilaaffigisinnaasaannik atuiniaraanni coronamut akiuussutissalertissimanermut uppernarsaammik saqqummiussisarnissaq pineqanngilaq, oqartussammi innuttaasut malittarisassanik malinnissasut tatigimmassuk. 

Ilisimatitsissutigineqarporli, inuit timmisartumut umiarsuarmulluunniit ilaallutik aallalersut politiinit misissuiffigineqarsinnaasut.

Piumasaqaatinut ilaatinneqanngitsut

Ilaasut illoqarfimmut najugaqarfimminnukartussat piumasaqaatinut ilaatinneqanngillat, tassa sulinngiffeqarlutik sulinerminnulluunniit atatillugu illoqarfimmi allaniittut angerlarsinnaasariaqarmata. Illoqarfinniilli aallarnissamik pilersaaruteqartut akiuussutissalertissimanissamut piumasaqaateqarfigineqarput.

Piumasaqaatit nutaat juulip qaammataata naaneranut atuukkallassapput, coronalli tuniluunnerata qanoq innera apeqqutaatillugu oqartussat nutaanik piumasaqaateqalersinnaasut oqaatigineqarpoq.

Oqartussanit akiuussutissalerneqarsinanngitsut ukkatarineqarput, taakkuummatami Covid-19-imik tunillatsissagaluarunik napparsimarujussualersinnaasut.

Piumasaqaammik unioqqutitsisoqartillugu politiit akiligassiisinnaapput, pilersaarutaavorlu politiit misissuisassasut.

Innuttaasut kaammattorneqarput fiisternaveersaaqqullugit

Angerlarsimaffinni fiisternerti kaffillernerillu pinaveersaaqquneqarput.

Taxat "kikkut tamarmik ilaaffigisinnaasaannut" piumasaqaammut ilaatinneqanngillat, taamaammat akiuussutissalertissimanngitsut suli taxanut ilaasinnaapput.

Inuit 20-t katerissinnaanerannut piumasaqaat qaammatip naaneranut atuutsinneqarpoq.

29-t tunillatsissimasut

Tunillatsissimasut 29-usut oqartussanit maannakkorpiaq ilisimaneqarpoq, taakkulu imatut agguataarsimallutik:

  • Avannaata Kommunia: 1
  • Kommuni Qeqertalik: 0
  • Qeqqata Kommunia: 6
  • Kommuneqarfik Sermersooq: 10
  • Kommuni Kujalleq: 12

Nunarsuarmi tuniluuttoqarnerani nunatsinni tunillatsissimasut aatsaat taamak amerlatigipput. Maannamut inuit 32.724-t ataasiarlutik akiuussutissalertissimapput, inuillu 18.915-it marloriarlutik akiuussutissalertissimallutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER