Nakkutilliisut: Suliat pinartuunerusut kommunep suliarisarpai
Qeqqata Kommuniani inuit innarluutillit pillugit sullissisut suliassaqangaatsiarput. Sullissisut katillugit sisamaasut oqaloqatiginninnissani eqqissisimanerusumik avatangiiseqarnissaq amigaatigisarpaat, suliallu pinartuunerusut suliarisarlugit. Kommunip sullissisut amerlanerusut atorfinitsinniarpai.
Namminersorlutik Oqartussat Qeqqata Kommuniani inunnik innarluutilinnik sullissineq misissuiffigaa. Kommuni Sisimiuni marlunnik Maniitsumilu marlunnik suliassanik suliarinnittoqaraluartoq, taamaattoq suliassarpassuusut, nakkutilliiartornermit nalunaarusiami atuarneqarsinnaavoq.
Nakkutilliiartortut Sisimiuniinnerminni immikkoortortaqarfimmi aqutsisumit ilisimatinneqarput ulapputtoqartoq. Suliassat suliarineqarnerannut tunngatillugu suliassat tassanngaannaq suliassaalertarnerat nukingiussassaasarnerallu sulinermut sunniuteqartartoq oqaatigineqartoq, ilisimatitsissutigineqarpoq.
Oqaloqatiginninnerit avatangiisini eqqissisimanerusuni ingerlanneqarsinnaannginneri aamma malugineqartarpoq, sullissisut allaffeqatigiimmata.
- Oqaatigineqartutut suliassanik suliarinnittartut marluk taakkua allaffeqatigiipput, tamatumalu inummik innarluutilimmik eqqissilluni oqaloqateqarnissaq ajornakusoortittarpaa. Inuit innarluutillit ataasiinnarmik aallussiniapiloortooreerput aammalu oqaloqateqarnerup nalaani ukkassiniapiloortooreerlutik.
- Taamaattumik inimi, alla issialluni sulisoq, oqaloqateqarnissaq unammillernartortaqarpoq. Tamatuma malitsigisaanik pisuni arlalinni oqaloqateqarnerit uneqattaarnermik sunnersimaneqartarput, nakkutilliiartornermit nalunaarusiami erseqqissarneqarpoq.
Maniitsumi ulapputtoqartoq aamma, immikkoortortaqarfimmi pisortaasup ilisimatitsissutigaa.
Iliuusissatut pilersaarutit amigaataasut
Nakkutilliiartortut tikeraarnerminni Sisimiuni meeqqat innarluutillit pillugit sullissinerit arfineq-pingasut immikkut misissuiffigaat. Suliani arfineq-pingasuusuni marluk piareersimasumik iliuusissatut pilersaaruteqarfigineqanngillat.
- Tamatuma kingunerisaanik meeqqanut marlunnut taakkununnga iliuusissanut pilersaaruteqanngilaq. Taamaasilluni tapersiinissamut pisariaqartitaannut siunnerfinnik aalajangersaasoqarsimanngilaq. Suliassat arfinillit sinnerinut iliuusissanut pilersaarut suliarineqarsimavoq, nalunaarummi allanneqarpoq.
Maniitsumi taamatuttaaq meeqqat innarluutillit pillugit suliat pingasut misissorneqarput. Taakkunani tamani atuuttumik iliuusissatut pilersaarummik peqartoqanngilaq. Tamanna isumaqarpoq iliuusissanut pilersaarut naammassineqarsimanngitsoq, imaluunniit aallartissimanngitsoq.
Sulissisut amerlanerulersinniarneqarput
Qeqqata Kommunia ukioq manna aalajangersimavoq inuit innarluutillit pillugit sullissisunik amerlanerusunik atorfinitsitsissalluni.
Qeqqata Kommunia siunnersuuteqarnermini nassuerutigaa inuit innarluutillit tapersersorneqarnissamik pisinnaatitaaffeqartut kommunimi amerlanerulersimasut, Inatsimmi nutaaq naapertorlugu taperserneqarsinnaasut amerlanerulersimapput.
Naatsorsuinerup takutippaa Sisimiuni nunaqarfiinilu innuttaasut 196-it aamma Maniitsumi nunaqarfiinilu inuit 94-it Inatsisartut inatsisaat nutaaq naapertorlugu kommunimit taperserneqarnissamik pisinnaatitaaffeqartut.
Qeqqata Kommuniani qitiusumik aqutsiveqarfiup ilisimatitsissutigaa amerlanerusunik atorfinnik pilersitsinissamik suliaqartoqartoq.