Naalakkersuisut: Illersornissaqarfik aserfallatsaaliornerup ingerlatsinerullu saniatigut akiliinerusariaqarpoq
Illersornissaqarfiup Kangerlussuup mittarfiata atornissaanut atatillugu Naalakkersuisut danskit naalagaaffianut allanik aamma piumasaqarput. Naalakkersuisunut ilaasortat pingasut Kangerlussuarmi innuttaasunut ataasinngormat ataatsimiisitsimmata tamanna paasinarsivoq.
Illersornissaqarfiup Kangerlussuup mittarfianik siunissami atuiinnarnissaanut tunngatillugu Naalakkersuisut danskit naalagaaffianut allanik piumasaqarput. Piumasarineqartoq tassaavoq, Kangerlussuup mittarfittut atuinnarnissaanut pisariaqartut allat ulluinnarni ingerlanneqarneranut illersornissaqarfik aningaasaleeqataassasoq.
Tamanna paasinarsivoq Karl Frederik Danielsen, Ane Lone Bagger aamma Kim Kielsen peqatigalugit Kangerlussuarmi innuttaasunik ataasinngormat ataatsimiisitsimmat.
- Naalakkersuisuninngaanniit ersarissumik oqariartuutigineqarpoq, mittarfik atorneqassappat, aamma mittarfiup pisariaqartitai pinngitsoornagit taava akileeqataaffigissavasi, attaveqatigiinnermut naalakkersuisoq, Karl Frederik Danielsen (S) Kangerlussuarmi innuttaasunik ataatsimiisitsinermi oqarpoq.
Karl Frederik Danielsen ataatsimiisitsinermi ilisimatitsivoq Kangerlussuarmi ingerlatsinermi aningaasartuutit maanna qulaajarneqartut, sivikinnerpaamillu ukioq ataaseq qulaajaaneq ingerlassasoq. Assigiinngitsorpassuit misissorneqassapput.
- Qulaajaanerit sivikinnerpaamik ukioq ataatsip ingerlanerani ingerlanneqassapput. Kangerlussuup ingerlaqqinnissaanut elværkit, qulliit, hotelit, eqqaavissuaq allallu annertuumik aningaasartalinnik kinguneqartussaammata, qulaajaanerit sivikinnerpaamik ukioq ataatsip ingerlanerani ingerlanneqassapput, oqarpoq.
Siunnerfeqarluni atsioqatigiinneq
Naalakkersuisut danskillu naalagaaffiat Illersornissaqarfiup Kangerlussuup mittarfiata siunissami atuinnarnissaanut siunnerfeqatigiillutik atsioqatigeereerput. Siunnerfeqarnermik nalunaarummi Kangerlussuarmi nutarterinissaq ingerlatsinissarlu kiap akilissanerai allassimanngilaq. Taakku pillugit illersornissamut ministeri Trine Bramsen (Soc.) marlunngornermi Kangerlussuarmukartussaagaluarpoq naalakkersuisut ataatsimeeqatigiartorlugit. Naapinnissarli ukiumut nutaamut kinguartinneqarallarpoq.
Akisussaaffimmik ilisimannippoq
Trine Bramsen siusinnerusukkut erseqqissaanikuuvoq, mittarfimmik nutarterinissamut aserfallatsaaliinissamullu tunngatillugu 'illersornissaqarfiup akisussaaffissani ilisimaarigai', aammali isumaqatigiissut ima paasisimallugu Illersornissaqarfiup Kangerlussuup atorsinnaaneranut aallaaviussasoq timmisartut sumiiffimmit qangattarsinnaallutillu missinnaanissaat kisimi.
- Kangerlussuarmi aningaasaliissuteqarnissamut Illersornissaqarfiup Kalaallit Nunaanni suliassaminik naammassinnissinnaanera aallaaviussaaq, tassa qulakkiissavarput Illersornissaqarfiup timmisartuutaasa qangattarlutillu missinnaanissaat. Ataatsimeeqateqaraangamali siutikka tamaasa atorlugit tusarnaartuaannarpunga. Taamaammat kalaallit suleqatimma kissaataat oqaaseqaatigisinnaasaallu tusarnaassavakka, illersornissamut ministeri Trine Bramsen (Soc) oqarpoq.