Naalakkersuisoqatigiit nutaat tallimanngornermi saqqummiunneqartussanngortut
Inatsisartuni sisamanngornermi unnukkut ulapaartoqarpoq. Demokraatiniillu nalunaarutigineqartut arlallit naapertorlugit naalakkersuisoqatigiit nutaat tallimanngornermi saqqummiunneqassasut, Sermitsiaq.AG-p paasivaa.
Obs: Siumut, Demokraatit aamma Nunatta Qitornai tallimanngornermi nalunaaqutaq 10.00 tusagassiortunik katersortitsilerput.
Siumumi aamma Demokraatini ilaasortat arlaqartut sisamanngornermi unnukkut Inatsisartoqarfimmiipput. Ilaasortat arlallit sumiiffik nalunaaqutaq 23.00 missaanni aatsaat qimappaat.
Sermitsiaq.AG-p paasissutissaatai malillugit Demokraatit marlunnik pingasunilluunniit naalakkersuisuutitaqalissasut tallimanngornermi nalunaarutigineqassaaq.
Pisut Sermitsiaq.AG-p qanimut malinnaavigai.
Nivi naalakkersuisunngussanngilaq
Paasisat naapertorlugit Demokraatit siulittaasorigallagaat Nivi Olsen Naalakkersuisunngussanngilaq.
Domkraatit naalakkersuisoqatigiilernissamik soqutigisaqarnerat apeqqutinik arlariinnik pilersitsivoq. Pingaartitat sorliit naalakkersuisoqatigiit isumaqatigiissutaanni ilanngunneqassappat, suullu maanna atuuttumit peerneqassanersut apeqqutinut ilaapput. Taakku pillugit ullumi nalunaaqutaq 10.00 tusagassiortunik katersortitsisoqarpat paasisaqarnerussagunarpugut.
Siumumi siulittaasussatut sassartut ilaat, Erik Jensen, siornatigut oqaaseqarsimavoq Demokraatit maanna naalakkersuisoqatigiinnut ilaalernissaat piffissaanngitsoq, Siumumilu siulittaasunngorniunnermi atortutut taallugu.
Siulersuisuunerit akuersisut
Nivi Olsen maajip aallartinnerani ilisimatitsivoq Kim Kielsenimut isumaqatiginninniartoqarnissaanut naalakkersuisoqatigiilernissamut siulersuisuunerit akuersisimasut. Tamanna pillugu Sermitsiaq.AG-mut ima oqarpoq:
- Partiitut tapersersortaasu†ut sanianiit nilliaannarmut sanilliullugu, partiip naalakkersuisoqatigiinni pisussaaffeqarluni suleqatataanissaa partiimut pitsaanerpaassaaq, Nivi Olsen taamani oqarpoq.
