assammik arsaanneq
Minik Dahl Høegh uteqqinnermini sisamaraartoq
Århus Håndbold pingasunngornermi unnukkut HC Midtjyllandimut naligiippoq
Sapaatip-akunneri marluk matuma siorna Minik Dahl Høegh sungiusartilluni qaratsaminik sajuppillatsitsivoq. Tassani niaqqumigut arsamik sakkortuumik eqqortippoq.
Marlunngornermi Ikastimi HC M Midtjyllandimut unamminissaq sioqqullugu sallaatsuinnarmik sungiusartarpoq. Unamminerup aallartinnissaata tungaanut Minik Dahl Høegh arsarsinnaanersoq nalornissutaavoq.
Oqaatigiinnaraanni. Saamiatungaani backiusartoq immikkuullarissuuvoq. Unamminerup aallartinnerani Minik Dahl Høegh tamaviaarluni aallartippoq.
Ajoqusinnginneq sioqqullugu sungiusaasup Erik Veje Rasmussenip Minik Dahl Høegh aallarteqqaartittarneratut iliorpoq. Kisianni saassussinerinnarni.
Ataqqinninneq annertooq
HC Midtjyllandimi arsartut Minik Dahl Høegh unamminerup aallartinneraniilli nakkutigilluarpaat. Annertuumik ataqqinnittoqarnerata maluginiarneqarnerullu kingunerisaanik, Århus Håndboldimi arsartunut allanut arlaleriarluni periarfissiisoqartarpoq.
Minutsit 30-t siulliit naligiiffiupput. 3-3, 6-7, 9-9, 11-11 naligiiffiupput, HC Midtjyllandilu muminnermi 16-14-imik siuaqqavoq.
Atuaruk: Minik Dahl Høegh ajugaaqqittoq
Immikkoortup aappaa
Unamminerup immikkoortuata aappaani Minik Dahl Høegh isertitseqqaartuuvoq. HC Midtjylland ingerlaannaq isertitsivoq, 17-15, taamatullu ingerlaqattaarput. HC Midtjylland ataasiarluni målinik pingasunik siuaqqavoq 23-20.
Århus Håndbold ilungersorluni angummattaqattaarpoq. Minik Dahl Høegh akiuulluartoq isertitsimmat 23-22-erput. Minutsit arfineq-pingasut amigaataapput.
Naapertuuttumik pointit avinneqartut
Unammisut arlaat ajugaasimasinnaagaluarpoq. Anisitsisoqarpoq, strafferluni isertitseriartoqarpoq, periarfissanillu annaasaqartoqarpoq. Minutsit marluinnanngortut naligiipput, 27-27. Minik Dahl Høegh straffertussanngortitsivoq, tamannalu Århus Håndboldimit atorluarneqarpoq, 27-28.
Sekundtit quliinnanngortut Århus Håndboldimi arsartoq anisitaavoq. HC Midtjylland isertitsivoq, 28-28. Taamaalillunilu naleqquttumik unammisut tamarmik ataatsimik pointinnapput.
Minik Dahl Høegh pingaarutilinnik sisamanik isertitsivoq.
Sakkortooq
Ikastimi unammereernerup kingorna, ullumi sisamanngornermi Sermitsiaq.AG-p Minik Dahl Høegh oqaloqatigaa.
- Unammineq ajunngilaq, soorunalimi ullumikkut unamminerup kingorna unammineq sakkortusimasoq malugisinnaavara. Sapaatip-akunnerinimi marlunni sungiusarnikuunngilanga, HC Midtjyllandilu pitsassuuvoq, danskillu pissartanngorniunneranni pitsaanerpaat akornanniinnissamik anguniagaqarput, Minik Dahl Høegh oqarpoq.