Minik Dahl Høegh ajugaaqqittoq

Ukiup unammiffiusup aallartinnerani ajornakusoortumik aallartinnerup kingorna, Århus Håndbold tulleriiginnarnik sisamanik ajorsareerluni aallartippasilerpoq.

Unamminerup siuliani Ribe-Esbjerg HH-mut marlunnik pointinnapput. Ataasinngornermilu unnukkut Minik Dahl Høeghip Århusimi unammisartoqatinilu ingerlalluarnertik nangippaat. Tassami Randers HH-mut 36-24-mik ajugaapput.

Pissangananngitsoortoq
Randers HH unamminermi aallartilluarpoq. Minutsinilu siullerni akiuulluarlutik. 5-5, 8-8 aamma 10-10, unamminerullu immikkoortuata siulliup naalernerani Århus Håndbold siuarpoq. Muminnermilu målinik sisamanik siuaqqapput.

Århus Håndbold unamminermi pisassaanngilaq, piffissap ilaanilu nikinganeq annertuvoq. 18-14-imik siuaqqaneq 24-14-inngortinneqarpoq. Minik Dahl Høehgip isertitami tallimassaa isertimmagu 27-19-erput. Minik Dahl Høeghip tallimanik isertitsinerminut misiliinerit arfiniliinnaat atorpai.

Ataqatigiikkiartulersut
Ajugaanerup kingorna Minik Dahl Høegh isumalluarpoq. Sermitsiaq.AG-millu oqaloqatiginninnermini ima oqarpoq:

- Arpattariaatsigut ilikkariartulerpavut. Unammisartut siornatigut unammeqatigiissimanngitsut arsaqatigiikkaanngamik sungiusiniaqqaartariaqartarput.

- Illersuinermilu inissilluaraangatta pitsaasartoq isumaqarpunga, taamaaleriarluta målertarpugut.

Minik Dahl Høeghip oqaloqatigiinnermi tulliani unamminissartik qilanaaralugu isertuutinngilaa. KIF Kolding København unammissavaat. Unammineq okbtobarip 22-anni Brøndby Hallenimi pissaaq.

- Angusaqarluarnissatsinnut periarfissaqarluta ilimagilluinnarpara, Minik Dahl Høegh Sermitsiaq.AG-mut naggasiilluni oqarpoq.

Normu 33 atortuaannaraa
Minik Dahl Høegh GOG-mi arsarallarami normu 33 atortarpaa. Maannalu Århus Håndboldimi aamma nunanut allanut unammisarnermini atortarlugu. Qaqortumi meeraalluni timersoqatigiiffia K33 puigorneqanngilaq.