Mimi Karlsen ukiaanerani ataatsimiinnerup sinnera napparsimalluni sulinngiffeqassaaq
Inuit Ataqatigiit sinnerlugit Inatsisartuni ilaasortaq, Mimi Kelsen, Inatsisartut ataatsimiittarfianut uterallassanngilaq. Ukiaanerani ataatsimiinnerup sinnerani sinniisoqalernissamik Inuit Ataqatigiit maanna sulissuteqarput.
Mimi Karlsen sapaatit akunnerni pingasuni napparsimalluni sulinngiffeqarallartussaasoq septemberip 28-ani nalunaarutigineqarpoq. Sapaatit akunneri pingasut qaangiussimalerput, Mimi Karlsenili Inatsisartut ataatsimiittarfiannut utissanngikkallarpoq.
Inatsisartuni ilaasortaq ukiaanerani ataatsimiinnermi peqataassanngilaq, napparsimalluni sulinngiffeqarami.
Sinniisut pingajuat aggersarneqarpoq
Partiimi ilaasortat ilaat, Aqqa Samuelsen, Qasigiannguani Juunarsip Atuarfiani pisortatut atorfininnini pissutigalugu politikkimit tunuarmat sinniisoq Mariane Paviasen Inatsisartuni ilaasortatut ivertinneqarsimalerpoq. Qinersinermilu kingullermi inernerit naapertorlugit Debora Kleist taannaalerpoq sinniisuni isertussaq.
Inuit Ataqatigiit Inatsisartuni allattoqarfia ilisimatitsivoq Debora Kleist peqquteqarluni Inatsisartunut sinniisutut isissanngitsoq.
Sinniisutut qinigaasut pingajuat, Agathe Fontain aggersarneqarsimalerpoq. Aggersaanermilu suliassat inissereeriarpata, Agathe Fontain, Mimi Karlsen sinnerlugu Inatsisartut ataatsimiittarfianni inissaminut ingissinnaalissaaq.