Mimi Karlsen napparsimalluni sulinngiffeqarallarpoq

Inatsisartuni ilaasortaq Mimi Karlsen sapaatit akunnerni pingasuni napparsimalluni sulinngiffeqarallarpoq. Sinniisoq Mariane Paviasen inatsisartunut aggersarneqarpoq.

Inatsisartuni ilaasortaq nutaaq issiavissaminut ullumi ingippoq. Tassa Mariane Paviasen Narsameersoq. Taanna sinniisutut issiangallassaaq, Mimi Karlsenip napparsimalluni sulinngiffeqarnerani.

Inatsisartut ukiaanerani ataatsimiinnerata aallartinneraniit ullut pingasut aatsaat qaangiupput.

Sinniisunngortoq Mariane Paviasen avataanit ilisimaneqanngivinngilaq, politikkikkullu sulinermik misilittagaqarluni.

Urani Naamik-mi siulittaasuuvoq. Narsamilu uranitalimmik piiaasoqannginnissaanik suliniuteqartunut ukiuni arlalinni siuttuusimalluni. Inuussutissarsiornermut Aatsitassanullu Naalakkersuisunngorlaaq aamma ataatsimeeqatigeqqammerpaa.

Urani Naamik-mi suliniuteqartuusup aatsitassarsiornermi ersarissumik paasissutissiisarnissaq sulissutigiuarsimavaa. Kujataanilu inuussutissarsiutit pigineqareersut inerisarneqarnissaannik aamma noqqaasareerluni.

Mariane Paviasen Inatsisartunut 2018-imi qinersisoqarmat 95-init taajuunneqarpoq.

Inuit Ataqatigiit sinnerlugu Inatsisartuni ilaasortaq, Mimi Karlsen, sapaatit akunnerni pingasuni napparsimalluni sulinngiffeqassasoq, IA-p Inatsisartuni allattoqarfiata Sermitsiaq.AG-mut ilisimatitsissutigaa.

Powered by Labrador CMS