Kommuneqarfik Sermersooq
Meeqqanut suliassanut iluarsartuussinissamut immikkut isumaginninnermik siunnersortiliineq
Kommuneqarfik Sermersooq, kommunimi meeqqanut inuussuttunulli suliassanut 1.200-t missaanniittunut iluarsaanissamut isumaginninnermut siunnersortinik sisamanik aqutsisussamilllu atorfinititsiniarpoq
Namminersorlutik Oqartussat nakkutilliisoqatigiivisa, Kommuneqarfik Sermersuup meeqqanik inissiisarnerni aamma angajoqqaarsianik Nuummi akuersissuteqartarnermik aqutsinera ''amigarpoq aamma suliani naammaginartumik iliuuseqarnermut piumasaqaatinut tunngatillugu illersorneqarsinnaannginnerarlugu'' ukioq kingulleq isorinnilluni nakkutilliinermik nalunaarusiaq saqqummiuppaat.
Kommuneqarfiillu pingaarnersaat meeqqanut inuussuttunulli suliassarpassuit maanna iluarsartuunniarneqalerput.
Iluarsartuussinissamut 2,3 million koruunit
Suliffeqarfimmut Kiffartuussiviup Aningaasaqarnermut Inuussutissarsiornermullu Ataatsimiititamut inassuteqaatigaa suliassanut meeqqanut tunngasunut iluarsaassinissamut 2.3 mio. koruunit atorneqarnissaat akuerineqassasoq. Ataatsimiititap ullumi sisamanngornermi ataatsimiinnermini oqaluuserisassaani allassimavoq.
Aningaasat isumaginninnermut siunnersortit sisamat aqutsisulli 2018-miit 2020-imut sulianik iluarsaannissaannut atorneqassapput. Deloittep Meeqqanut Ilaqutariinnullu Ingerlatsivik suleqatigalugu suliassat meeqqanut tunngasut suliarineqartut iluarsaannissaannut ukiut pingasut ingerlasussamik pilersaarummik innersuussuteqarnerisa kingorna pivoq.
Aamma atuaruk: Nuummi meeqqanik sumiginnaaneq ernumatsannartoq
Suliassat 900-t annertuumik amigaatillit kukkunillillu
Kommuneqarfik Sermersuumi meeqqanut inuusuttuaqqanullu suliassat suliarineqartut 1.200 missaanniittut naatsorsuutigineqarpoq aammalu suliassat suliarineqartut 75 procentiisa missaat amigaateqarlutilluunniit annertuumik kukkuneqartut. Tassa imaappoq suliassat 900-t missaanniittut annertuumik amigaatillit kukkunillillu iluarsaanneqarnissaannut pisariaqartitsisoqarpoq.
Ullormut oqaluuserisassami allassimavoq, meeqqanut inuusuttuaqqanullu suliassanut tunngasut iluini kukkunerit amigaatillu pineqartillugit iluarsaatassat pisariaqartinneqartut assigiinngitsuusussaapput oqimaassusaat amerlassusaallu eqqarsaatigalugit.
Aamma atuaruk: Meeqqat inuunermik ulorianartorsiortillugit sumiginnakkat
Amigaatillit arlaqartut
- Kukkunerit immikkoortissagaanni makkuusinnaapput inatsit tunngavigalugu malitseqartitsinngitsoornerit, angerlarsimaffiup avataanut inissiisarnermut tunngatillugu inummut tunngasumut nakkutilliinngitsoornerit, ikiorsiissutinut tunngatillugu suliamik
aallartitsinngitsuuinerit/naammassisaqanngitsuuinerit iliuusissamillu pilersaarusiunngitsoornerit. Aammali meeqqanut inuusuttuaqqanullu suliassat tunngasut amerlaqisut ikiorsiissutip aallartinneqartup sunniuteqanngitsoornera/sunniuteqarsimanngitsup, atuutilersimanngisaannartup suliamullu pisarialinnik paasissutissiinngitsup naapertuutinngitsumilluunniit suliarineqartup minnerunngitsumillu inatsit naapertorlugu tunngaviusumik allaaserineqarneranit
paasissutissiinngitsoq, ullormut oqaluuserisassami allassimavoq.
Deloitte naliliivoq, pisariaqartinneqassasoq aallarniutigalugu "immikkoortiterineq" suliat suliarineqartut tamaasa periuseq una pingasunngorlugu avillugu ingerlanneqassasoq:
- Immikkoortoq 1 suliassaapput, nalilerneqartut, piffissami qaammatit arfinillit ingerlaneranni isumaginninnermut tunngasut iliuutsit oqitsunnguit tunuliaqutaralugit naammassineqarsinnaasut
- Immikkoortoq 2 suliassaapput, nalilerneqartut, ikiorsiissutit aallartitat naapertuuttuunissaat taamaattorli suliassat ataatsimik arlalinnilluunniit amigaatillit immikkoortinneqartut ima: isumaginninnermut tunngasunik suliatigut misissuinerit, iliuusissatut pilersaarutit, inatsisitigut malitseqartitsineq piumasaqaataasoq imaluunniit angerlarsimaffiup avataanut inissinneqartumut inuttaanik nakkutiginninneq
- Immikkoortoq 3 suliassaapput, ikiorsiissutit aallartitat naapertuuttuunissaat taamaattorli suliassat ataatsimik arlalinnilluunniit amigaatillit immikkoortinneqartut ima: isumaginninnermut tunngasunik suliatigut misissuinerit, iliuusissatut pilersaarutit, inatsisitigut malitseqartitsineq piumasaqaataasoq imaluunniit meeqqamik inuusuttuaqqamilluunniit angerlarsimaffiup avataanut inissinneqartumut inuttaanik nakkutiginninneq
Aamma atuaruk: Nakkutilliinermit nalunaarusiaq: Nuummi meeqqanut suliassaqarfinni makku suliassapput