Politikki
Martha Lund Olsen naalakkersuisoqarfigisimasaminut isornartorsiuisoq
Sara Olsvigip (IA) akisussaaffianut Martha Lund Olsen isornartorsiortunik arlalinnik apeqquteqarluni naalakkersuisoqarfigisimasani meeqqat atugarliortut pillugit sammisaqarpoq
Meeqqanut atugarliortunut suliniutit pillugit Martha Lund Olsen (S) Naalakkersuisunut arfineq-pingasunik apeqquteqarnermini, naalakkersuisoqarfimmi siuttuuffigisimasamini toqqaannartumik annernartumik apeqquteqarpoq: Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfimmut.
Apeqqutit ilaatigut Kommune Kujallermi meeqqanut atugarliortunut unammilligassat annertuut nalunaarusiani saqqummiunneqartunut tunngapput, taakkulu kingunerisaannik naalakkersuisoqarfik siorna kommunimi siunnersortinik aallartitaqartariaqarsimavoq.
- Tasiilami nakkutilliinerup kingorna ilungersunarluinnartumik nalunaarusiortoqarnikuuvoq, meeqqat 500 sinnerlugit pillugit ernumassuteqartoqarluni. Naalakkersuisut Tasiilami nakkutilliinerup kingunerisaannik nakkutilliinermik allamik malitseqartitsisoqarnikuua, soorlu Kommune Kujallermi pisumut assingusumik?, Martha Lund Olsen aperivoq, taanna januaarip naanerani kommunimut qinigassanngortinniarluni isumaliuuteqarmat attaveqatigiinnermut naalakkersuisutut soraarsitaavoq.
Atuaruk: Kim Kielsen tusagassiortunik aggersaavoq
Inatsimmik allanngortitsineq akerleriissutaasoq
Martha Lund Olsen siornatigut isumaginninnermut naalakkersuisuuvoq. Tassunga atatillugu siorna isumaginninnermut aqutsisoqarfimmi inatsimmik akerleriissutaasumik atuutsilersitsivoq, matumani Namminersorlutik Oqartussat kommunip isumaginnittoqarfia meeqqanut sulianut tunngatillugu sumiginnaatillugu akisussaasunngorsinnaalerluni.
Atuaruk: Meeqqanut suliassani kusanaatsuliortoqarnissaa inatsisip nutaap pinngitsoortissavaa
Maanna inatsit Naalakkersuisut atorusunnginneraat apeqquteqarpoq.
Meeqqat inuunerat peqqissusaallu ulorianartorsiortoq
Taanna februaarip pingajuanni Sara Olsvigip tusagassiuutinut nalunaarutigisaanut unnussersuussivoq, tassani atuarneqarsinnaavoq '' Kommune Kujallermi meeqqat atugarliortut sullinneqarneranni ajornartorsiuterpassuaqartoq'' aammalu ''meeqqat atugarliortut inuunerannut peqqissusiannullu toqqaannartumik kingunerlussinnaasunik'' paasisaqartoqartoq''.
- Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaata allanngortinneqarneranik Inatsisartut inatsisaat (...), Naalakkersuisut kommunit isumaginninnikkut maleruaqqusat toqqammavigalugit ingerlatsinerannik atorunnaarsitsissallutik aalajangersinnaanerannik pisinnaatitsissutitalik naapertorlugu, meeqqat inuunerat peqqissusaallu annaanniarlugit Naalakkersuisut iliuuseqarniarpat?, Martha Lund Olsen aperivoq.
Aamma atuaruk: Martha: "Taamaammat kommunalpolitikkimut nuulerpunga"
Kommuneqarfik Sermersooq ingerlatsiffigineqassava?
Tasiilami nalunaarusiaq tunngavigalugu Naalakkersuisut inatsit taanna Kommuneqarfik Sermersuumut atorniarneraat aamma taassuma paaserusuppaa, atorneqarnianngippallu suna pissutaanersoq qanorlu iliortoqarniarnersoq paaserusuppaa.
Atuaruk: Siunnersuut assortuussutaasoq Asiip peerusuppaa
Naalakkersuisuusimasup naggataatigut aamma danskit naalakkersuisuisa danskit aningaasaqarnermut inatsisaat 2017-imut atuuttoq aqqutigalugu 2,5 millionit koruuninik ukiumoortumik, ukiuni sisamani atuuttussamik immikkoortitaat qanoq atorneqarniarnersut paaserusuppaa.