Siunnersuut assortuussutaasoq Asiip peerusuppaa

Isumaginninnermut Naalakkersuisunut ilaasortap, Martha Lund Olsenip (S), siunnersuut assortuussutigineqartoq, kommunit namminersorneranut annertuumik kalluaasoq utertittariaqarpaa.

Kommuneqarfik Sermersuumi borgmesteri, Asii Chemnitz Narup (IA), kommunalbestyrelsip siunnersuummik eqqartuereernerisa kingorna tusagassiuutinut nalunaarummi taama naqissusiivoq.

Atuaruk: Meeqqanut suliassani kusanaatsuliortoqarnissaa inatsisip nutaap pinngitsoortissavaa

Isumaginninneq
Inatsisissatut siunnersuut ullumikkutut oqaaseqatigiiliorneqartillugu Isumaginninnermut Naalakkersuisunut ilaasortap isumaginninnermi suliassaqarfik kommunimit tiguneqassanersoq aamma kommunip aningaasaatai qanoq amerlatigisut isumaginnittoqarfimmik aqutsinermut atorneqassanersut nammineerluni aalajangersinnaavaa.

Periarfissaq taamatut ittoq ernumanartortaqarsinnaavoq. Allanik periarfissaqartoq, Asii Chemnitz Narup isumaqarpoq.

Suleqatigiinneq
- Nakkutigineqarnerulerneq aamma oqartussaasut akornanni tigussaasumik suleqatigiinneq ajornartorsiutigisatsinnut pitsaanerpaanik iluarsiissutitaqassapput. Kommuneqarfik Sermersuumi innuttaasut pisariaqartitaannut aningaasat eqqarsaatigineq ajorpavut. Tamanna ilassutitut aningaasaliissuterpassuarnik kinguneqartarsimavoq, kisianni suliniuterput pitsaasumik nakkutiginninnitsigut suli pitsanngorsinnaasoq isumaqarpugut, borgmesteri oqarpoq.

Naammagittaalliortoq
Kommuneqarfik Sermersuumi Kommunalbestyrelsip marlunngormat februaarip ulluisa qulingiluaanni Isumaginninnermut Naalakkersuisunut ilaasortap inatsisissatut siunnersuutaa pillugu tusarniaassummut akissuteqarpoq.

Kommunalbestyrelsip isumaqatigiissup Naalakkersuisunut ilaasortap isumaginninnermi suliassaqarfimmik kommunimit tigusinissaanut periarfissinneqarnissaa naammaginagu oqaatigaa.

Atuaruk: Qaasuitsumi meeqqanut suliat pillugit nakkutilliisut nutaat