Skip to main content

Kulturilerisunut nersorinninneq

Borgmester Asii Chemnitz Narup inuiattut ullorsiornermi oqalugiaataa eqqumiitsuliornermullu kulturimillu aamma nersorinnissutaavoq

Borgmester Asii Chemnitz Narup inuiattut ullorsiornermi oqalugiarnermini Nuummi innuttaasut amerliartornerannik nuannaarutiginnippoq.

- Nuummi maanna 17.000-it sinnerlugit inoqalerpoq, upernaaq manna meerarpassuit inunngorput.

Oqaatiginngilaali nuna tamakkerlugu innuttaasut tamatuma peqatigisaanik ikiliartornerat ukiunilu arlaqalersuni siullerpaamik 56.000-it inorlugit amerlassuseqalersimammata.

- Inuit amerliartornerisa malitsigisaannik inissianik amerlasuunik atorfissaqartitsivugut. Aappariit meeqqiortut, ilinniartorpassuit utoqqaallu pisariaqartitaannut naleqquttunik naammattunillu sanaartortariaqarpugut, borgmesteri maluginiakkat tunngavigalugit oqarpoq.

- Angerlarsimaffeqarneq pisinnaatitaaffiusariaqarpoq, erseqqissaavoq.

Inuiattut ullorsiornermi pisussat matumani aamma atuakkit.

Borgmesteri inuiattut erinarsuutit Nuna Asilasooq Jonathan Petersenimit taalliarineqartoq aamma Nunarput Utoqqarsuanngoravit Henrik Lundimit taalliarineqartoq erinarsorneqarnerisa akornanni seqinnarissuup ataani oqalugiarpoq.

Tamanna sioqqullugu qamutilittartoqarlunilu erfalasoq amuneqarpoq, tamatumanilu Nunarput erfalasorlu Frederik Kunngi Kristensenimit taalliarineqartoq Ludvik Kuluk Kristensenimillu erinniorneqartoq erinarsoqatigiinnit atorneqarluni.

Hanne Saandvig, nipilersornermik ilinniarfiup aqutsisua, nutaatut erinarsoqatigiinnik aqutsisuuvoq.

Eqqumiitsuliorneq kulturilu

 Asii Chemnitz Narup oqalugiarnermi ilassuteqarluni oqarpoq, qallikkuinnaq ineriartortitsinissaq naammanngitsoq.

- Taamatulli pingaartigaaq Kalaallit Nunaata inuunerata ilorliup nukittorsartuarnissaa, nunattalu inuisa tarnikkut anersaakkullu sanngisuujunissaasa kulturikkullu sorlaqarluartumik inuuneqarnissaasa periarfissittuarnissaat. Kulturikkut sorlaat isigaqassapput aqqutit nutaat atuarneqarsinnaaqqullugit.

Eqqumiitsuliortunik pikkorissorpassuarnik akornatsinniittoqarnera nuannaarutigaa. Assersuutigalugu erinarsornerup nipilersornerullu, taalliornerup, qiperuinerup, atuakkiornerup, isiginnaartitsinerup, atisanik ilusilersuinerup, kusanartuliornerullu iluanni.

Pinngorartitsisinnaanermik nukiit taakku inuiaqatigiittut kinaassuseqarluartutut, nutartertuartutut nunarsuarmioqataanermik pingaartitsisutut namminiileriartortutullu atorluartariaqarpavut, ullut tamaasa. Kusanartuliortut eqqumiitsuliortut taakkuupput uummatip ulikkaarutaannik uatsinnut ingerlatitseqqiisartut, isumaliornartunik suliaqarnermikkut nutaanik eqqarsalersitsisartut, pisunut apeqqusiinissamut tinnersaasartut, misikkarissutitsinnik ipissaasartut, qamuunalu  pisuunnguallattutut ataatsimoortutullu uatsinnik misigititsisartut. Ullumikkuinnaanngitsoq ukiorli kaajallallugu kulturikkut suliniutit ersialaartinneruniarlik – tammatsaaliineruppat nutaaliorneruppalluunniit, Asii Chemnitz Narup oqarpoq, eqqumiitsuliortunullu toqqaannartumik oqaatsit uku atorlugit saaffiginnilluni:

Asasavut eqqumiitsuliortut, tamassinnut qujanarsuaq, ilisseqarmat inuunerup qanoq imartutigineranik, assigiinngisitaartuutigineranik qalipaatigitsigineranillu eqqaasinneqartuarpugut. Uummativut ammartutut ittarpasi.

Borgmesterip aamma ukioq manna inuiattut ullorsiornitsinni erfalasutta ukiut 30-t matuma siorna amuneqaqqaarnera eqqaasitsissutigaa.

Erfalasorput pillugu allaaserisaq atuaruk.

Ulloq puigunaaqisoq tulluusimaarnartorlu.Nunatta pinngortitaassutsimigut ilisarnaatai amerlasuut tassani katiterneqarnerat torrallataavoq, ullumikkullu katersuuffittut tamatsinnut ilisarnaataalersimalluni: Sermersuaq, kangerluppassuit, imaq, seqineq taamalu aamma qaamaneq kiatseqqinneralu, oqarpoq.

Arctic Winter Gamesimut erfalasutta amuneqaqattaarfigisassaanut, sisorarfinni timersortarfinnilu, qaammatit arfineq-pingasunngornerat aamma eqqaasitsissutigaa.

Taamanikkussamut inuusuttut timersortartut kulturilerisullu tusintsit arlaqartut AWG-qarnissaanut peqataajartortut tikilluaqqusussaagatsigit.

Iluatsitsinissatsinnut assaat amerlasuut atorfissaqartinneqarput. Ullumi ulloq atorluarneqarli nammineq piumassutsimik suleqataanissamut suna pilerinarnerunersoq eqqarsaatigilluarnissaanut, Asii Chemnitz Narup oqarpoq-

Nuutoqqami ullaaq naggaserlugu Nuuk Byorkester nipilersorput naalagiaqatigiittoqarlunilu.

Nuummi inuiattut ullorsiornermi ullaakkut pisunut ataqatigiissaarisoq Georgine Graversen aqutsisuuvoq.

Borgmesterip oqalugiaataa tamakkerlugu kalaallisut qallunaatullu ilanngunneqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER