Inuiattut ullorsiorneq
Nuummi inuiattut ullorsiorneq ima nalliussineqassaaq
Kommuneqarfik Sermersooq sapaatiuppat 21. juuni Inuiattut Ullorsiornissamut ulloq naallugu pisussanik ukioq manna pilersaaruteqaqqippoq.
Kalaallit Nunaanni Inuiattut Ullorsiorneq sapaatiuppat juunip 21-ani nalliussineqassaaq.
Ullaakkut nalunaaqutaq arfineq-pingasunut ileqquusumik qamutilittarneq Nuummi Nuutoqqami ingerlanneqassaaq taavalu borgmesteri Asii Chemnitz Narup oqalugiassalluni.
Ualikkut pisussat Katuaq suleqatigalugu aaqqissuunneqassapput. Ukioq manna ilaatigut puisimik angoqqaanniuttoqassaaq, nipilersortoqassaaq ilaatigut Ida Heinrich, Nuummi Nipilersornermik Ilinniarfik taavalu Nuup illoqarfiata nipilersortartui aammalu The Påhængsmotors nipilersortorineqassallutik. Qaannamik, Inuit pinnguaataannik aammalu qimminik sungiusartunik takutitsisoqassaaq, Kommuneqarfik Sermersooq tusagassiorfinnut nalunaarummi allappoq.
- Inuiattut ullorsiornissamut ilaqutariinnut naleqquttunik pisussanik pilersaarusiorniarsimavugut, tamatsinnullu ataatsimoorfiusinnaasunik pilersaarusiorniarsimalluta, Kommuneqarfik Sermersuup borgmesteria Asii Chemnitz Narup, Inuit Ataqatigiit, oqarpoq.
Pisussat tamarmik Nuutoqqami nal. 13.00-ip nal. 17.00-illu akornanni isiginnaartitsisarfinni marlunni pissapput. Sila ajussappat, aaqqissuussat tamarmik Nuummi Illorsuaq Timersortarfimmi ingerlanneqassapput.