KRK: Uummammik aallartisaatit pisiarineqarluartut
Suliffeqarfiit arlallit uummammik aallartisaatinik ukiup aallartinnerani pisiniarnerusimapput. Kalaallit Røde Korsiata suliffeqarfiit soqutiginninnerunerat aallaavigalugu uummammik aallartisaatinik amerlanerusunik piniassamaalereerpoq.
Kalaallit Røde Korsiat, KRK, suliffeqarfinnit uummammik aallartisaatinik piserusuttunit arlalinit ukiumi nutaami saaffigineqarsimavoq.
Suliffeqarfiit saaffiginnissimasut Nuummeersuupput, sinerissameertuullutik allaallu nunaqarfimmiittuullutik.
- Ukioq mannamut uummammik aallartisaatinik qulinik piniarsimavugut, maannali arfinillit tunereerpagut. Suliffeqarfiit soqutiginninnerat aallaavigalugu piniaqqissaagut, Johan Barlaj, Kalaallit Røde Korsianni allaffeqarfiup pisortaa, Johan Barlaj Sermitsiaq.AG-mut oqaluttuarpoq.
- Soqutiginnittut arlallit saaffiginnipput. Suliffeqarfiit uummammik aallartisaatinik peqarnissaat pingaaruteqarpoq, upalungaarsimaniarnissaat eqqarsaatigalugu, allaffeqarfiup pisortaa ilisimatitsivoq.
Uummammik aallartisaat tassaavoq uummammik unittoortumik aallartitseqqiiniarluni atortoq batterisortoq. Atortup uummat pisariaqartillugu qupinnguallatitsinikkut "aallaqqaataaneertittarpaa".
Uummammik unittoortoqartillugu uummammik aallartisaat minutsit 3-5 iluanni atorsinnaagaanni, inuup uummamminik unittoortup annannissaa 50-70 procentimik isumalluarnarnerulersittarpaa, KRK siusinnerusukkut Sermitsiaq.AG-mut ilisimatitsinikuuvoq.
Kalaallisut ilitsersuut
Uummammik aallartisaammik pisinermi KRK atuinissamut pikkorissaanermik neqerooruteqartarpoq. Uummammilli aallartisaat aamma immiussaateqarpoq ilitsersuummik qallunaatut oqaasertaqartumik.
- Kalaallisut oqaluttulersorneqarsinnaanera maanna periarfissarsiuupparput. Neriuutigaarput siunissami ungasissorsuunngitsumi kalaallisut oqaasilimmik immiussisinnaassalluta, Johan Barlaj, KRK-mi allaffeqarfiup pisortaa oqarpoq.
Taanna ilisimatitsivoq suliffeqarfiit uummammik aallartisaataasumik peqareersut atortup atornissaanut pikkorissarneqaqqinnissamik kissaateqartut saaffiginnissinnaajuaannartut.