Suliffeqarfiit uummammik aallartisaatinik peqarnissaq eqqumaffigigaat
Uummammik aallartisaatit inuunermik annaassisinnaapput. Eqqumaffigineqarluarnerallu ajunngilluinnartuusoq, Røde Kors isumaqarpoq, sorliilli peqarnersut nalunaarsorsimanissaat kissaatiginartikkaluarpaa.
Akunnittarfiup ataatsimiittarfiani peqataasup uummamminik unittoornera, HHE-mi sulisut sapaatip akunnerata siuliani misigaat. Akunnittarfik uummammik aallartisaammik ataatsimik peqarpoq, taannalu saaffiginnittarfimmiilluni. Taanna ambulancet takkunnissaata tungaanut atorneqarpoq.
- Pigisatsinni uummammik aallartisaatinik peqarnissarput politikkerivarput, ukiullu pingasut-sisamat peqareerluta. Aatsaat maanna atorneqartariaqalersimavoq, Hotel Hans Egede A/S-imi siulersuisuni siulittaasoq Helge Tang oqaluttuarpoq.
Uummammik aallartisaat akunnittarfiup saaffiginnittarfiani, ulloq unnuarlu sulisoqartuaannartumi, nivingavoq. Taannalu naammattoq, Helge Tang isumaqarpoq.
- Ajunngilaq. Tassaniitinneqarpoq ambulancet takkunnerminni tigunissaat pisariaqartikkunikku tiguneqariaannanngorlugu, oqarpoq.
Suliffeqarfinni eqqumaffigineqarneruvoq
Suliffeqarfinni annerni uummammik aallartisaateqarnissaq eqqumaffigineqarnerulersimavoq. Sermitsiaq.AG-p paasiniaanerani tamanna paasinarsivoq. RAL, Air Greenland, Brugsni aamma Pisiffik uummammik aallartisaateqarput. Kalaallit Røde Korsianni allaffeqarfimmi pisortap, Rikke Bruun de Neergaardip, tamanna nuannaarutigaa.
- Uummammik aallartisaateqarnerup ikiueqqaarsinnaanerullu ukkatarineqarneri pingaaruteqarluinnarput, oqarpoq.
Olav Pedersen, Kalaallit Nunaanni Røde Korsimi peqqissutsimut siunnersortiusoq, oqaluttuarpoq uummammik aallartisaateqarnerup, uummammik unittoornerup nalaani annaassinissap 50-it 70 procentillu akornanni qaffattaraa, uummammik aallartisaat 3-5 minutsit iluanni ikkunneqarsinnaappat.
Nuummi uummammik aallartisaatit ulluat
Nunarsuaq tamakkerlugu uummammik aallartisaatit ulluat, 6. oktober Nuummi siorna siullermeertumik malunnartinniarneqarpoq. Kalaallit Røde Korsiat peqatigiiffik nutaa Hjerteliv tassani naapippaa, suliniutaasinnaasullu pillugit oqaloqatigalugu.
- Sumiiffiit sorlit uummammik aallartisaataateqarnersut pillugit nalunaarsuinissap isumassarsiatsialaanera takusinnaavarput, aningaasalersorneqarnissaanulli aningaasaateqarfinnik suleqateqarniartariaqarpugut, Rikke Bruun de Neergaard oqarpoq. Nalunaarsuisoqarpammi uummammik unittoornermi arpassinnaasunik aaqqiinissaq periarfissaalissaaq.