Kristian Jeremiassen: Umiarsuit arlallit kivinikut qaqinneqassapput
Kristian Jeremiassenip Qasigiannguaneersup Siumut tunuliaqutaralugu politikkeriusimasup, maanna IA tunuliaqutaralugu Inatsisartuni ilaasortaasup Aasianni amutsivimmi angallat kiveqqasoq angallallu alla ikkarlissimasoq peerneqarnissaat noqqaassuutigaa.
Kilisaatit kivinikut Nunatsinni ikigisassaanngillat. Maannalu qaqinneqassasut, Kristian Jeremiassen (IA) isumaqarpoq.
Polar Aassik, Polar Seafoodip kilisaataa martsimi 2021-mi Qasigiannguit eqqaani kivivoq. Maannalu Polar Seafood Københavnimi eqqartuussissuserisutut ingerlatsiviit ilisimaneqartut marluk Avatangiisinut Naalakkersuisoqarfimmut sakkortuumik kilisaatip qaqinneqarnissaanut tunngatillugu maalaaruteqarniarlutik ingerlatsipput.
Kristian Jeremiassen politikkerit akornanni tassunga tunngatillugu qanimut malinnaanikuuvoq. Polar Aassik pillugu arlalinnik paragraf 37 naapertorlugu Naalakkersuisunut apeqquteqartarsimavoq. Maanna aamma Aasiaat eqqaani angallatit kivinikut qaqinneqarnissaat noqqaassutigilerpaa.
- Paaserusuppata kiap akisussaaffigineraa amutsivimmi talittarfimmiittoq, aammalu piginnittut peqquneqarnikuuppat peerneqarnissaa pillugu. Aasianni angallatip kivinikoq takussunarpoq mingutitsillunilu. Piginnittup peerneqarnissaanut akisussaasariaqarpoq, Kristian Jeremiassen Sermitsiaq.AG-imut oqarpoq.
- Kikkut akiligassarivaat?
Angallat amutsivimmi kivinikup kiap akisussaaffiginera arlaleriarluni Qeqertalimmi kommunalbestyrelsinut apeqqutigisarsimallugu taanna oqaluttuarpoq. Marloriarlunilu akineqarnikuunani.
Kristian Jeremiassen maanna Inatsisartuni ilaasortaanini atorluarlugu Naalakkersuisunut akiap umiarsuaq pigineraa apeqqutigaa. Ilaatigullu qaqugu qaqinneqassanersoq Naalakkersuisullu piginnittumut akisussaaffimmik tiguseqqusissanersut apeqqutigalugu.
- Kikkut peerneqarnissaaanut akiliissappat. Isumaqarpunga piginnittut akiligassarigaat pigigamikku pisortat peerneqarnissaanut akiliisanngillat, Kristian Jeremiassen paragraf 37 naapertorlugu apeqquteqarnermini tunngavilersuivoq.
Taassumallu saniatigut Ikersassuarmiittoq qangali ikkarlussimasoq peerneqarnissaanut aamma noqqaassuteqarpoq.
- Ikerasassuarmiittoq maanna ilisarnaataavoq, kisianni aamma asiusussaavoq mingutitsillunilu. Taanna aamma peerneqarnissaa inissaminiitippara, Kristian Jeremiassen oqarpoq.