Eqqartuussissuserisut akisuut atulerpai

Københavnimi eqqartuussissuserisutut ingerlatsiviit ilisimaneqartut marluk Avatangiisinut Naalakkersuisoqarfimmut sakkortuumik maalaaruteqarput.

Polar Seafoodip qallunaat eqqartuussissuserisutut ingerlatsiviat nuimasooq Gorrisen Ferderspiel umiarsuaatileqatigiiffiup kilisaataataa kivinikoq pillugu suliassippaa. Avatangiisinut Naalakkersisoqarfiup Polar Seafood peqquvaa umiarsuarmit 300 meterinik itissusilimmi kiveqqasumit dieseluulia qaqissagaa.

Københavnimi eqqartuussissuserisutut ingerlatsiviit nuimanersaasa ilaat, Gorrisen Federspiel, Polar Seafoodip Avatangiisinut Naalakkersuisoqarfimmut atulerpai, aviisi AG allappoq.

Kilisaatip kivinikup Polar Aassiup kivineranut atatillugu suliassami eqqartuussissuserisut 13-inik quppernilimmik maalaaruteqarput.

Avatangiisinut Naalakkersuisoqarfiup Polar Seafood peqqunikuuvaa kingusinnerpaamik oktobarip 31-ianni uulia 53.000 liiteri kilisaammiittoq qaqeqqullugu, uulia ajoqutaajunnaarseqqullugu imaluunniit kilisaammit immap naqqamiittumit peeqqullugu. Tamatumunnga pissutaavoq naalakkersuisoqarfiup ernumagigamiuk uulia Qeqertarsuup Tunuani mingutsitsissasoq.

Polar Seafood kingusinnerpaamik aggustip 15-ianni pilersaarummik saqqummiussissaaq selskabip umiarsuaq qanoq isilluni uuliaarneqassasoq.

Gorrisen Federspiel allappoq uuliap peerneqarnissaa teknikkikkut ajornarluinnartuusoq aammalu peerniarnissaa akisuvallaarujussuassasoq, mingutsitseratarsinnaaneranut sanilliullugu.

Tamatuma saniatigut eqqartuussissuserisut suliassap ingerlatseriaasikkut inatsisitigullu qanoq ingerlanneqarsimanera pillugu Avatangiisinut Naalakkersuisoqarfik sakkortuumik isornartorsiorpaat.

Eqqartuussissuserisut isumaqarput Polar Seafood illua’tungiliuttutut suliassami naammattumik tusaaniarneqarsimanngitsoq.

Allaaserisaq tamaat uani AG-mi atuaruk:

Powered by Labrador CMS