Kommunip meeraaqqerivinnut meeqqerivinnullu akit apparpai

Kommuneqarfik Sermersuumi kommunalbestyrelsip aalajangeqqammerpaa, angajoqqaat meeraaqqerivinni meeqqerivinnilu meeraatillit tamarmik meeqqerivinnut akiliinikinnerusalernissartik qilanaaruteqarsinnaalersillugit.

Isertitaqaateqartartut tamarmik sipaartoqarneranik misigisaqassapput, politikerilli aalajangernerat pissutigalugu, angajoqqaat isertitakitsut akunnattunillu isertitallit ullumikkumut sanilliullugu sipaaruteqarnersaassapput.

Assit assersuutit paasisani takukkit.

Annerpaaffissaa killilerneqartoq
Tamanna ilutigalugu nammineq akiliutissat amerlanerpaaffilerneqarput, taamaalilluni ilaqutariit isertitaat qanorluunniit amerlatigigaluarpata meeqqaminnik paarsititsisarnerminnut qaammammut amerlanerpaanik 2.500 koruuninik akiliisalissapput.

- Kommunalbestyrelsimuna akisussaassuseqartumik sukannersumillu aningaasanik aqutsinerata angajoqqaat meeqqerivinnut akiliutigisartagaat malunnaatilimmik ikilisillugit tamakku periarfissaqarnerulersikkai, borgmesteri Asii Chemnitz Narup, tusagassiuutinut nalunaarummi oqarpoq.

- Kommunalbestyrelsip ilaqutariit meerartallit isertitakinnerpaallu pingaarnerutikkai, aamma Kommuneqarfik Sermersuumi ilaqutariit meerartallit pisariaqartitsinerpaajusut isumagineqarsinnaalernerat immikkut nuannaarutigaara. Soorluttaaq inuusuttortatta Nuummut uteqqinnissaasa akinillu appasissunik isumagineqarlutik suleqqilernissaasa pilerinartunngortinneqarnissaannik anguniagarput nuannaarutigigiga.

Aalajangiineq ataavartussaq
Sermersuumi aningaasanik siunissami akit appasitsiinnarnissaanut immikkoortitsisoqarpoq.

Akit ukiormanna apparneqarnerat 2,5 mio. koruuningajannik naleqassaaq.

2017, 2018 aamma 2019-imi ukiunut tamanut akinut apparneqartunut akuerineqartunut 5 mio. koruuninik immikkoortitsisoqartassaaq.

Atuaruk: Nakuusa: Meeqqat affaasa maanna pisinnaatitaaffitik ilisimavaat