Kommuneqarfik Sermersooq: Meeqqat Illersuisuata isumaginninnerup iluani ajornartorsiutit ilisarisinnaavai
Namminersorlutik Oqartussat nakkutilliisuisa nalunaarusiaanni inerniliussat Meeqqat Illersuisuata Aviâja Egede Lynge’p ilisarisinnaavai.
Inunnik isumaginninnermi aqutsisoqarfimmi ajornartorsiutaasut nakkutilliisut nalunaarusiaminni allattorsimasaat, innuttaasut MIO-mut saaffiginnissutigisartagaasa uppernarsaraat, Meeqqat Illersuisuata ilisimatitsissutigaa.
Meeqqat Illersuisuat, Aviâja Egede Lynge tusagassiutinut nalunaarummini allappoq.
- Angajoqqaat, atorfillit, inersimasullu allat MIO-mut saaffiginnittartut suliat arriippallaamik ingerlanneqaraangata imaluunniit saaffiginnissutitik kommunemit akineqarneq ajoraangata, tusagassiutinut nalunaarummini allappoq.
Kommuneqarfik Sermersuumi inunnik isumaginninnerup iluani sullissineq pillugu nakkutilliisunit nalunaarusiaq saqqummerpoq.
Pitsaasumik ingerlavoq – sulilaarli
Kommuneqarfik Sermersooq isumaginninnerup iluani ajornartorsiutinik aaqqiiniarnermini pitsaasumik ingerlasoq, Isumaginninnermut Naalakkersuisoqarfiup Nakkutilliinermik ingerlatsiviata nakkutilliinermit nalunaarusiaani saqqummeqqammersumi erseqqissaatigineqarpoq.
Sulialli pitsanngorsangassaasut suli arlaqartut, 2016-imi 2017-imilu nalunaarusiortoqareernerata kingorna nakkutilliinermit nalunaarusiami atuarneqarsinnaavoq.
Kommunep iliusissaminik pingaartitsilersimanera Meeqqat Illersuisuata pitsaasutut isigaa. Kommuneli ilumut ataavartumik iliuuseqarnissaminut attatitsisinnaassanersoq ernumanartoqartippaa, allannguinerummi nalaani pinartumik pisoqartillugu ikiuigasuartussanik sillimasoqartuarnissaata pingaaruteqarluinnarneranik Nakkutilliisut oqariartuuteqarnerat, MIO-p tapersersorpaa.
- Angajoqqaat meeqqaminnik sumiginnaagaangata, inunnik isumaginnitseqarfiup sillimanissaa ima nukittutigisariaqarpoq allaat pisortat ingerlatsinerannut meeqqat tatiginnissinnaasuarnissaat anguneqartariaqarluni. Sulisussaaleqineq aaqqissuilluakkamillu isumaginninnermik ingerlatsineq amigaataasoq unamminartorsiortitsisinnaasarpoq, meeqqalli pisinnaatitaaffia aallaavigalugu ikiuinnginnissamut utoqqatsissutaanngisaannassaaq, Meeqqat Illersuisuat Aviâja Egede Lynge tusagassiutinut nalunaarummini allappoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...