Nakkutilliineq: Sermersooq isumaginninnermi aqutsisoqarfimmi suli ajornartorsiuteqarpoq
Nakkutilleeqqinnerup takutippaa Kommuneqarfik Sermersooq pitsaasumut ingerlasoq, kommunili isumaginninnermut aqutsisoqarfimmi suli ajornartorsiuteqarpoq.
Kommuneqarfik Sermersooq isumaginninnerup iluani ajornartorsiutinik aaqqiiniarnermini pitsaasumik ingerlasoq, Isumaginninnermut Naalakkersuisoqarfiup Nakkutilliinermik ingerlatsiviata nakkutilliinermit nalunaarusiaani saqqummeqqammersumi erseqqissaatigineqarpoq.
Sulialli pitsanngorsangassaasut suli arlaqartut, 2016-imi 2017-imilu nalunaarusiortoqareernerata kingorna nakkutilliinermit nalunaarusiami atuarneqarsinnaavoq.
Allakkiornerit naammaginanngitsut
Suliamut tunngatillugu allagartalersuinerit allakkiornerillu naammaginanngitsut, nakkutilliinermik aqutsisoqarfiup arlaleriarlugu nalunaarusiami ilannguppaa. Isumaginninnermi meeqqat pillugit suliaqarnermi meeqqanik pinerliisimannginnermut uppernarsaatit naammattumik pissarsiarineqartarsimanngillat.
Nakkutilliinernit nalunaarusiarineqartartuni siuliini tamanna ajornartorsiutitut taaneqartareeraluartoq, meeqqanik sullissisut pillugit meeqqanik pinerliisimannginnermut uppernarsaatinik piniartarneq suli aaqqiivigineqarsimanngilaq.
Kommunellu iluani suliani nalunaarsuineq aamma naammaginanngilaq. Nakkutilliinermit nalunaarusiami ima allaatigineqarpoq:
- Kommunep nammineq oqaatigaa sullissineq sullinneqartut mappiinik aallaaveqartoq aammalu allagaatit pisariaqartinneqartut tamarmik tassani nassaassaasariaqartut. Tamannali eqqunngilluinnarpoq. Suliat amerlanersaanni allagaat pisariaqartinneqartoq ataaseq arlallilluunniit amigaataapput, soorlu aalajangiinerit, naatsorsuinerit, innuttaasumut allakkat, nakorsap uppernarsaasiineri il.il.
Nalunaarusiami ilanngunneqarsimavoq allagaatit post-it-inik sungaartunik taarserneqarsimasut.
Allagaatinik amigaateqarneq innarluutilinnik suliaqarfimmi ajornerpaavoq, ajunnginnerpaallunilu soraarnerussutisianik suliaqarfimmi.
Nuup illoqarfiit allat puigorpai
Nakkutilliinermit nalunaarusiap pitsanngorsangassatut taasaata ilagaat kommunep iluani pitsaanerusumik attaveqatigiinnissaq.
- Kommuneqarfik Sermersuumi tamarmi nakkutilliiartorsimaneq tunngavigalugu Nakkutilliinermik ingerlatsiviup nalilerpaa kommunemi tamarmi Inunnik isumaginnittoqarfimmi sulliviup iluani, sulianut tunngatillugu attaveqaqatigiinneq annertuumik amigaateqartoq, nalunaarusiami allassimavoq.
Nuummi sulisut kommunillu illoqarfiini allani sulisut suleqatigiinniarnerat ajornartorsiutaavoq. Nakkutilliinermit nalunaarusiami allassimavoq Ittoqqortoormiini Paamiunilu sulisut Nuummi sulisununit akuersaarneqanngitsutut misigisimapput. Isumaginninnerup iluani angalasartut Nuummeersut tikimmata tamanna ersarissimavoq. Nakkutilliinermik ingerlatsiviup Ittoqqortoormiinnerata nalaani Nuummiit angalasartut sulisunik ikiuiartorlutik tikipput, pitsaanngitsumilli suleqatigiittoqarpoq, kingunerisaanillu najukkami isumaginninnermik suliaqartoq soraarpoq.
Nakkutilliinermik nalunaarummi allassimavoq tamanna pinngitsoortinneqarsinnaasimagaluartoq, Nuummi Ittoqqortoormiillu akornanni isumaginnittoqarfimmi pitsaanerusumik attaveqatigiittoqarsimagaluarpat. Pingaartumik isumaqatigiinngittoqarpoq meeqqat pillugit suliani kiap suut suliarissanerai.
Aqqut persuanartoq takisoorlu
Nakkutilliinermi nalunaarusiaq pillugu Kommuneqarfik Sermersooq ilanngussaqarluni allaatigisaqarsimavoq. Allagaatit amigarnerat attaveqatigiinnerullu pitsaanerusariaqarnera pillugu kommune ilanngussaqanngilaq, taamaattoq kommune allappoq, isumaginninnerup iluani pitsanngorsaaniarneq takisuumik kipiluttunartumillu aqqutissaqartoq. Tassunga kommunep pissutaatippaa isumaginninnermi sulisussat pisariaqartinneqartut sulisorilernissaat ajornartorsiutaammat.
- Aqutsisoqarfimmi pisortat suli isumaqarput, isumaginnittoqarfimmi sulisut sulisoriinnarnissaat suliamilu ataqatigiissumik suliaqarnissamut pikkorissarnissaat, taamaasilluta aqutsisoqarfiup ineriartornissaanut pilersaarutaa, Namminersorlutik Oqartussat malittarisassaat nunarsuarmilu isumaqatigiissutit assigiinngitsut naammassinissaat anguniarlugit, iliuutsit ilungersunartuusut, Kommuneqarfik Sermersooq allappoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...